AMAKURU

UKWEZI
Canal+ christmax

Ntitwarwanya kwishimira Noheli n’umwaka mushya icyo dushaka ni ukwirinda gukwirakwiza COVID-19- CP Kabera

Ntitwarwanya kwishimira Noheli n’umwaka mushya icyo dushaka ni ukwirinda gukwirakwiza COVID-19- CP Kabera
29-12-2020 saa 10:43' | By UKWEZI | Yasomwe n'abantu 459 | Ibitekerezo

Umuvugizi wa Polisi y’u Rwanda, Commissioner of Police(CP) John Bosco Kabera yongeye kwibutsa abaturage ko bagomba kongera imbaraga mu kubahiriza amabwiriza yo kurwanya COVID-19, kandi buri muntu akumva ko bimureba nk’inshingano ze.

CP Kabera yabigarutseho mu kiganiro cyatambutse kuri tereviziyo y’u Rwanda mu gitondo cyo kuri uyu wa Mbere tariki ya 28 Ukuboza 2020.

Yashimiye abaturage uko bitwaye mu kwizihiza umunsi mukuru wa Noheli. Ariko yanagaragaje ko hari abantu bamwe bafashwe barenze ku mabwiriza yo gutahira igihe muri ibi bihe byo kurwanya COVID-19. Hari abafashwe bagenda nyuma ya saa mbiri z’umugoroba abandi bafatwa batambaye agapfukamunwa.

Yagize ati “Abaturarwanda bagomba kumenya ko tutarwanya kwishimira Noheli n’umwaka mushya. Icyo dushaka ni ukwirinda gukwirakwiza COVID-19. Ibi birasaba kubahiriza amabwiriza ku rwego rwo hejuru aho turi hose no mu byo dukora byose.”

Yongeye kwibutsa abantu kujya bategura gahunda zabo hakiri kare kugira ngo badahura n’ikibazo cy’umuvundo mu muhanda, bigatuma isaha ya saa mbiri z’ijoro isanga bataragera mu ngo zabo. Yabasabye kwirinda ibintu byose bitemewe bishobora gutuma bafatirwa mu makosa.

Ati “Tuributsa abantu ko tukiri mu bihe bigoye kandi bisaba buri muntu kubahiriza amabwiriza yo kurwanya COVID-19. Buri muntu arasabwa kubahiriza amabwiriza uko yakabaye. Nta tandukaniro riri hagati y’umunsi mukuru wa Noheli n’umunsi mukuru wo gusoza umwaka.

No kuri uwo munsi, abantu bagomba kubahiriza amabwiriza aho kubihatirwa. Buri muntu akwiye kumva ko icya mbere ari ubuzima.”

Yakomeje ashimira abantu bakomeje gutangira amakuru ku gihe ku bantu barenga ku mabwiriza, avuga ko bifasha mu kugenzura iyubahirizwa ry’amabwiriza ndetse no kurwanya ikwirakwira ry’icyorezo cya COVID-19.

Mbere y’iminsi mikuru, Polisi y’u Rwanda yari yakanguriye abaturarwanda kuzubahiriza amabwiriza yo kurwanya COVID-19, bakirinda ibirori nk’uko byari bimenyerewe mu myaka yashize.


INKURU ZA :
Tanga Igitekerezo
Ibitekerezo
canal Rwanda
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA