AMAKURU

UKWEZI
pax

Muhanga : Ishuri ririmo kwishyuza ababyeyi amafaranga y’ishuri rinabatera ubwoba

Muhanga : Ishuri ririmo kwishyuza ababyeyi amafaranga y’ishuri rinabatera ubwoba
17-05-2020 saa 17:32' | By Chief Editor | Yasomwe n'abantu 14599 | Ibitekerezo 24

Ubuyobozi bw’ikigo cy’amashuri cyitwa Ahazaza Independent School giherereye mu karere ka Muhanga, burimo kwishyuza ku ngufu amafaranga y’ishuri muri ibi bihe abanyeshuri bari mu rugo, bakanatera ubwoba ababyeyi ko bazahura n’ingaruka nibatabyubahiriza.

Kuri iki Cyumweru tariki 17 Gicurasi 2020 nibwo ubuyobozi bw’iki kigo bwandikiye ababyeyi bubamenyesha ko bagomba kwishyura igice cy’amafaranga y’ishuri ngo abarimu bahembwe, kandi ayo mafaranga ntazabarwe ku mafaranga y’ishuri muri Nzeri igihe abanyeshuri bazaba batangiye kwiga.

Umwe mu babyeyi twaganiriye yabwiye ikinyamakuru Ukwezi ko ikigo kibatera ubwoba nyamara nta n’impamvu ihari yatuma bishyura cyane ko ababyeyi benshi nabo bagezweho n’ingaruka z’icyorezo cya Coronavirus.

Uyu mubyeyi ati : "Barimo kutwishyuza amafaranga muri iki gihe abana bari mu rugo kuko ngo bagomba gukomeza guhemba abarimu amafaranga avuye mu babyeyi. Baritwaza imyitozo abarimu bohereza kuri whatsapp kandi si buri mubyeyi ufite whatsapp ngo ahe umwana iyo myitozo"

Umubyeyi urerera kuri iki kigo kandi avuga ko babatera ubwoba ko utazabikora umwana we azahita akurwa ku rutonde rw’abanyeshuri b’iki kigo. Uyu yagize ati : "Umuyobozi yavuze ko buri mubyeyi agomba kuba yatanze 55.000 kuri buri munyeshuri bitarenze tariki 30 z’ukwa gatandatu, ngo nyuma y’iyo tariki abazaba batarishyuye ayo mafaranga amazina y’abana babo azakurwa kuri lisiti y’abanyeshuri ba Ahazaza School".

Ababyeyi bavuga ko iki kigo mu ntangiro z’umwaka cyari cyanabishyuje amafaranga menshi kibizeza ko kigiye kwigisha muri gahunda mpuzamahanga izwi nka Cambridge kandi nabyo ngo ntibyakozwe.

Umubyeyi ati : "Ubusanzwe twishyuraga 94.000 frw ku gihembwe ariko uyu mwaka uhise uba imfabusa twari twishyuye 150.000 frw ku gihembwe cya mbere batubwira ko ishuri rigiye kuba international. Ariko nabyo ntibyigeze bibaho kuko abana bacu barakiga ibisanzwe."

Ndicunguye Janvier, ni Perezida wa Komiye y’ababyeyi barerera muri iki kigo. We yabwiye ikinyamakuru Ukwezi ko kuwa Gatanu tariki 15 Gicurasi 2020 komite y’ababyeyi yagiranye inama n’ubuyobozi bw’ikigo, bakagezwaho icyo cyifuzo ariko inama ikarangira komite y’ababyeyi icyanze, bagatungurwa n’uko umuyobozi w’ikigo yafashe icyemezo ku giti cye. Avuga ko ubu arimo kuvugana n’umuyobozi w’akarere ngo agire icyo afasha ababyeyi kuri icyo kibazo, akanavuga ko n’ubwo ikigo cyigenga kigendera ku mabwiriza ya Leta kuburyo yumva batazakura abanyeshuri ku rutonde uko bishakiye.

Umuyobozi w’iki kigo yabwiye ikinyamakuru Ukwezi ko ibyo yabikoze bitewe n’uko hari amafaranga y’igihembwe cya mbere ababyeyi batari bararangije kwishyura asaga yose hamwe miliyoni ebyiri. Gusa yemeza ko abagomba kwishyura ari ababyeyi bose hatitawe ku barimo umwenda w’igihembwe cya mbere kitasojwe kubera ikumirwa rya Coronavirus.


INKURU ZA :
Tanga Igitekerezo
Ibitekerezo 24
Ingabire jmv Kuya 20-05-2020

Barashaka kwikinga mukiza cya covid 19 ngo baronke amafaranga

Edizo Kuya 20-05-2020

Reka nshime kuba atekereza kubarimu be kuko azi akamaro bafitiye ikigo cye ! Iki kigo kirigisha nabitangira ubuhamya bitewe nabana bahaturuka bakaza kwiga iwacu muri Groupe scolaire officielle. Ababyeyi rwose namwe nimushyireho akanyu. Gusa ndanenga gahunda yo kwigisha abana bato i kigoroba rwose MINEDUC ikwiye kugikemura kuko abana barahangirikira bikomeye muburyo abantu benshi batazi.

UWIZEYIMANA Kuya 19-05-2020

Ariko sinumvishe ko ririya shuri ridaharanira inyungu ? nkeka ko amafaranga ari kwakwa ari ayo kwishyura service zatanzwe n’abarimu. Ahubwo twishimire ko dufite ishuri ryiza ritanga uburezi bufite ireme. ikindi kandi online teaching niyo igezweho ku isi yose, none se abo kuri iri shuri aribo basigara inyuma ?

Innocent Kuya 18-05-2020

Yewe niba bakora, ababyeyi batange make ariko nabo barezi babeho. Ubu ni ugufatanya byo rwose ibigo bitazafasha abarimu gusohoka muri ibi bintu mu itangira ntibizagenda neza. Ntabwiwitange buzaba mu barimu

Peter Kuya 18-05-2020

Uyu muyobozi ashaka kwigira mwiza ku barimu be ariko aciye mu nzira z’uburiganya n’igitugu. Niba ashaka guhemba abo barimu be yaca mu zindi nzira leta iri guteganyiriza abarimu bo mu mashuri yigenga. Ikindi ni uko numva nta cyo COVID 19 nta cyo imubwiye. RIB yatanga ubufasha da

Mugabo Kuya 18-05-2020

Ariko nyamara ababyeyi natwe harimo abakabya. Ese ntanubwo twashimira ibyo byibura abarimu bari gukora ? Ese umuti ni ugutangira kuvuga amagambo Atari meza ikigo kiturerera ? Ese ubundi buriya si uguterwa natwe tukitera ? Tuzi neza akamaro kiriya kigo kidufitiye, nge ndumva rero uyu atari umwanya wo kugitererana.

NZABANDORA Kuya 18-05-2020

Ese ubundi harya,umuntu utarize ibyo uburezi, amategeko cg amabwiriza ya MINEDUC amwemerera kuba DIRECTEUR W’ISHURI ? Murambabaje banyamuhanga. Ako gakecuru ubanza mutarakamenya. Akunda amafaranga, mu gombe kuyatanga agahemba abarimu, hanyuma akagira nyine n’ayo asagura. Ishuri se si irye. None se ntureba ko ibyemezo bya KOMITE Y’ABABYEYI YABITEYE UTWATSI. NTABWO MU MUZI, ariko ubanza ubu mutangiye ku mumenya ho gato. Azitwaza ko ayo masamo yakomeje, kandi mwayabonye, ubundi abishyuze. Gusa hakwibazwa niba iryo shuri rizakoresha ibizamini ryonyine, maze abana banyu bakaba bo batazongera kwiga mugihe abandi bazaba batangiye ; Ubwo abimuka bazimuka, kuko bitabaye ibyo, mwaba mugiye kwishyura inshuro 2. GUSA NANONE ABARIMU BO MUBINDI BIGO BYIGENGA BABAYEHO BATE ? Ndumwa formule ibindi bigo bafashe ari nabyo abo AHAZAZA bakurikira. Niba ayo mafaranga atazaba impfabusa, niba mutazabihomberamo, muyatange. ARIKO MU MWITONDERE, ATABAHITANA. M W I H A N G A N E K A N D I. Kubana n’uwo mu DIRECTEUR wanyu ni uko bimera.

Joshua Kuya 18-05-2020

Uwo muyobozi amenyeko ikigo cye kiri mu Rwanda rugendera kumategeko ntago akwiye kwiyemera bigezaho

R Kuya 18-05-2020

Ababyeyi nabo bagezwaho igitekerezo cyo gufasha mwalimu ngo nawe akomeze abeho bakishimira ko yamara amezi ane atabona na gato ndumva barite imyumvire ir(i hejuru cyane)None she bumva uwo Mwalimu azagira urukundo Ku bana no kumurimo we abikuye he ?usibye ko iki kibazo ubundi cyagakwiye kubazwa Mineduc kuko abana in abigihugu.Uyu muyobozi nawe ushyiraho ko inscription ari 55000fr afite ikibazo gikomeye

innocent Kuya 18-05-2020

Iki kigo gikunze kudushyiraho igitugu kitwaza yuko kiri muri Top ten mu Rwanda muri perfamance ariko iyo ntiyaba impamvu yo gutwara abarereramo uko bishakiye . kandi leta ibive imuzi irandure iki kibazo kuburyo burambye kuko usanga ababye bafite ibibazo byinshi bibaza kuri iki kigo , bamwe bavuga yuko bashyize abana ba gardiene kwiga ikigoroba babizeza yuko barikubaka kandi abashyizweho kwiga ikigoroba basobanuriwe yuko aruko batinze kwishyuri amafaranga y’ishuri mbere yuko umwaka w’amashuri atangiraho hafi igice cy’umwaka urenga. ngaho bakuba minerval bitwaje yuko bazahita bagisha kuri system ya combridge .

D Kuya 18-05-2020

They should close the school, they are not professionally fit to run it.

kamana Kuya 18-05-2020

Rwose abayobozi bakwiye kujya bareba ubuzima ababyeyi bafite abana ku kigo cyabo babayeho ! Isi yose ifite ikibazo cya Covid 19 none Raina ati muzane 55,000 !! ayavane muyasagutse umwaka ushize ahembe abarimu be !

Wilson Kuya 18-05-2020

nonese ko corona virus itumereye nabi nkaba numva harimo bamwe bashaka kwitwara nkayo ? uwo muyobozi akurikiranwe n’inzego za leta.

Christine Kuya 18-05-2020

Ntakubakanga ikigo kiri mugihugu cyiza kizira ihohotera ,ubuyobozi twizeye ko buzabikemura ,ntamwana ugomba gukurwa kurutonde

Christine Kuya 18-05-2020

Ndumva ubuyobozi aribwo bwazagenzura bwasanga Hari umuyeshuri wakuwe kurutonde ,umuyobozi w’ishuri akabihanirwa,kuko twese twagezweho n’ingaruka z’icyorezo

Djoha Kuya 18-05-2020

Ndumva uwo muyobozi atitaye kungaruka zaburi muntu nako z’isi yose abashinzwe uburezi banyarukireyo kuko nababyeyi binshyuye ntibishimiyeko abana bicaye batiga

Claudine Kuya 17-05-2020

Bayishyure nyine niba bashaka ko abana bahakomereza. None se simbona babyiganira imyanya nyiri ikigo nawe nicyo gikangisho afite kugirango bayishyure kdi ariya si menshi ku bakire bafite abana bigayo pee.nibafashe ubuyobozi bwihembere abakozi. Ariko kdi ubuyobozi bwari bukwiye kwishyuza mbere abo batarishyura aya mbere bukabona kwishyuza service zidahari.

Sibomana Laurent Kuya 17-05-2020

Ariko burya haracyari abantu batazi uko ubuyobozi bwuzuzanya mu mategeko ? Niba government ishyizeho amategeko abandi bazana ayabo bashingiye kuki ?

Alias Kuya 17-05-2020

Raina ntimumuzi sha.Azayabaca bayatange utazayatanga azamujyana mu Butabera.Kndi se iri shuri rye nta n’imitsindire na discipline yaho ko ikemangwa araca amafaranga y’iki ?Gusa igihe n’iki ngo Raina hamenyekane ububafa budakurikije amategeko yiha !Yitwaza iki cg nde ?

Alias Kuya 17-05-2020

Raina ntimumuzi sha.Azayabaca bayatange utazayatanga azamujyana mu Butabera.Kndi se iri shuri rye nta n’imitsindire na discipline yaho ko ikemangwa araca amafaranga y’iki ?Gusa igihe n’iki ngo Raina hamenyekane ububafa budakurikije amategeko yiha !

Gato Kuya 17-05-2020

Ariko se uyu amategeko agenderaho si ay igihugu. Abandi balimu ba prive baricaye ubukene barubumenyereye none we ngo nibabahembe. Niba abishoboye ni abahembe ku mufuka we. Ikindi ibyo yatangije bya cambridge ntabikore ni ubujura Mineduc ibikurikirane

Mama Rukundo Kuya 17-05-2020

Mwiriwe, rwose aka nakarengane n’agasuzuguro. Ubushize nabwo bongeza minerval yadushizeho igitutu ko abatari bw’ishyure abana babo batazabona imyanya mu kigo cye. None kandi ndebera pression ari kudushiraho. Oya rwose turambiwe agasuzuguro ka Raïna

Amani Kuya 17-05-2020

Uwo muyobozi w’ikigo abanze yibuke ko hari ababyeyi bagezweho n’ingaruka za COVID19 ku buryo batagikora kandi ariho bakuraga minerval. Niba ashoboye kwishyura abarimu nabishyure niba atabishoboye nabahe chômage technique. None se aragira ngo bigende bite ko twese twatewe tutiteguye

Amani Kuya 17-05-2020

Uwo muyobozi w’ikigo abanze yibuke ko hari ababyeyi bagezweho n’ingaruka za COVID19 ku buryo batagikora kandi ariho bakuraga minerval. Niba ashoboye kwishyura abarimu nabishyure niba atabishoboye nabahe chômage technique. None se aragira ngo bigende bite ko twese twatewe tutiteguye

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA