AMAKURU

UKWEZI
Canal+ christmax

Minisitiri w’Intebe yamaganye itangazo rivuga ko yagabanyije ibiciro by’ingendo biherutse guteza impaka

Minisitiri w’Intebe yamaganye itangazo rivuga ko yagabanyije ibiciro by’ingendo biherutse guteza impaka
21-10-2020 saa 09:09' | By Akayezu Jean de Dieu | Yasomwe n'abantu 4032 | Ibitekerezo

Ibiro bya Minisitiri w’Intebe w’u Rwanda byamaganye itangazo ryakwirakwijwe rivuga igabanyuka ry’ibiciro by’ingendo ku bakoresha imodoka rusange nyuma y’uko Dr Ngirente Edouard uyobora iyi Minisiteri atangaje ko agiye kubikurikirana.

Iri tangazo ryakwirakwijwe ku mbuga nkoranyambaga byagaragaraga ko ryashyizweho umukono na Minisitiri w’Intebe, Dr Ngirente Edouard gusa ibiro bye byateye utwatsi iri tangazo bivuga ko ari ibinyoma.

Ryavugaga ko Dr Ngirente yasabye ko Urwego Ngenzuramikorere, RURA, rusubizaho ibiciro byakoreshwaga mbere y’umwaduko w’icyorezo cya COVID19, ndetse ngo bigomba gutangira kubahirizwa ku wa 21 Ukwakira 2020.

Ku rukuta rwa Twitter, bagize bati “Serivisi za Minisitiri w’Intebe ziramenyesha Abanyarwanda bose ko ubutumwa bwakwirakwijwe ku mbuga nkoranyambaga ko ibiciro by’ingendo byasubiwemo atari ukuri. Turasaba Abantu bose kutabuha agaciro.”

Ku wa 14 Ukwakira 2020 nibwo Urwego Ngenzuramikorere, RURA, rwatangaje ko ibiciro by’ingendo byagabanyijwe, mu ntara biva kuri 30.8 Frw kuri kilometero bigera kuri 25.9 Frw, mu Mujyi wa Kigali biva kuri 31.9 Frw bigera kuri 28.9 Frw.

Ubwo ibiciro byamaraga gutangazwa, byagabanutse ku rwego ruringaniye ugereranyije n’ibyari byashyiriweho ibihe bya COVID-19 kuko imodoka zatwaraga abagenzi 50%, ariko ntibyamanuka mu buryo bwari bwitezwe, nyuma y’uko imodoka zemerewe gutwara abagenzi 100%. Hari na bimwe mu bice ibiciro byiyongereye, bijya hejuru y’amafaranga yashyizweho kubera COVID-19.

Harimo nk’urugendo Kimironko-Nyabugogo aho cyari kuri 383 Frw none cyashyizwe kuri 390 Frw, ndetse na Zindiro -Kimironko cyavuye ku 157 Frw kigera kuri 159 Frw.

Ibi biciro bishya muri rusange ntibyakiriwe neza n’abantu batandukanye, aho abakoresha imbuga nkoranyambaga bakomeje kugaragaza ko biri hejuru cyane, bijyanye n’ibihe badahagaze neza mu bukungu kubera icyorezo cya COVID-19.

Ku wa Kabiri tariki 20 Ukwakira, nibwo Ibiro bya Minisitiri w’Intebe, Dr Ngirente Edouard, byatangaje ko agiye gukurikirana ikibazo cy’ibiciro bishya by’ingendo, akazabifataho icyemezo mu gihe cya vuba.
Mu butumwa bwanyujijwe kuri Twitter, Ibiro bya Minisitiri w’Intebe byagize biti "Twakiriye ibibazo by’abaturage birebana n’izamuka ry’ibiciro byo gutwara abantu. Minisitiri w’Intebe hamwe n’inzego zibishinzwe bazabifataho umwanzuro mu gihe cya vuba."

Ubu butumwa nibwo abantu bataramenyekana bagendeyeho bahita basohora itangazo ryabo bavuga ko Minisitiri w’Intebe yamaze gutegeka RURA, kugabanya ibiciro bigasubira uko byahoze mbere ya COVID19, nyamara ni ibihuha.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA