AMAKURU

UKWEZI
ubumwe

Minisitiri SHYAKA yavuze ibigwi bya FRAIPONT washinze ikigo kimaze kuvura Abanyarwanda ibihumbi 300 bafite ubumuga

Minisitiri SHYAKA yavuze ibigwi bya FRAIPONT washinze ikigo kimaze kuvura Abanyarwanda ibihumbi 300 bafite ubumuga
12-10-2019 saa 16:35' | By Nsanzimana Ernest | Yasomwe n'abantu 1863 | Ibitekerezo 2

Minisitiri w’ Ubutegetsi bw’ igihugu Prof Shyaka Anastase yavuze ko guverinoma y’ u Rwanda ihuje umugambi na Padiri Fraipont Ndagijimana wo kwita kubafite ubumuga bityo ngo imbuto uyu mugiraneza yateye u Rwanda ruzazuhira.

Yabitangaje mu karere ka Nyanza kuri uyu wa 11 Ukwakira 2019, umunsi Padiri Fraipont yari kuba yujuje imyaka 100 iyo aza kuba akiriho.

Padiri Fraipont Ndagijimana yavutse tariki 11 Ukwakira 1919, atabaruka tariki 25 Gicurasi 1982. Ikigo HVP Gatagara cyashinze mu 1960 kivuza abafite ubumuga, kikanabafasha kuba mu muryango no kugira uruhare mu iterambere ry’ igihugu.

Ibirori byo kwizihiza isabukuru y’ imyaka 100 Padiri Fraipont Ndagijimana amaze avutse byabereye mu karere ka Nyanza mu kigo cya HVP Gatagara byitabirwa n’ abayobozi bakuru barimo Minisitiri Shyaka Anastase, Guverineri w’ Intara y’ amagepfo CG Gasana Emmanuel, Umushumba wa diyosezi ya Kabgayi Smaragade Mbonyintege n’ abahangariye ingabo na polisi y’ u Rwanda.

Minisitiri Shyaka yavuze ko guverinoma y’ u Rwanda ihuje na Padiri Fraipont Ndagijimana umugambi wo kwita kubafite ubumuga, bityo ngo yashyizeho inama y’ igihugu y’ abafite ubumuga ndetse iki kiciro gifite umudepite ugihagarariye mu nteko ishinga amategeko y’ u Rwanda.

Yagize ati “Nagira ngo mbizeze ko icyo cyerekezo kitazahinduka. Tuzakomeza kubiharanira, tuzakomeza kubyubaka tuzakomeza kubishaka. Fraipont mu mateka tumuziho yaharaniye kwamamaza ijambo ry’ Imana abibangikanya kandi bigenda neza ko kwita kubafite ubumuga haba mu buzima no mu burezi, no kwihangira imirimo yabikoze neza bidusigira imbuto nziza. Iyo mbuto nka Leta yacu y’ u Rwanda tuzayuhira”.

Avuga ko nka Leta y’ u Rwanda bazakomeza gushyigikira inama y’ igihugu y’ abafite ubumuga NCPD kugira ngo ikomeze itange serivise nziza ku banyamuryango bayo.

Mu izina rya guverinoma y’ u Rwanda Minisitiri Shyaka yashimye uruhare rwa Padiri Fraipont mu iterambere n’ imibereho myiza y’ Abanyarwanda bafite ubumuga, avuga ko abarerewe n’ abavuriwe mu kigo HVP Gatagara ubu bafite imirimo bakora muri Leta, abandi bari mu nama z’ ubuyobozi zitandukanye kuko bavuwe bakanafashwa kwiga.

Ikigo HVP Gatagara cyashinzwe mu 1960 kigenda kigaba amashami hirya no hino mu gihugu. Minisitiri Shyaka avuga ko ibi ari iterambere ryiza kandi rikenewe.

Musenyeri Simaragde Mbonyintege mu ijambo rye yasabye ko umuhanda werekeza ku kigo cya HVP Gatagara kiri mu karere ka Nyanza washyirwamo kaburimbo.

Yagize ati ‟Mwahabonye hariya hantu mwamanutse ruguru muza hano, mwahaciye mubona abana bafite ubumuga kuva ku muhanda kugera hano habera impanuka zitagira ingano kandi abana bava hano bajya mu biruko cyangwa babijyamo, yewe n’abarangije muri iri shuri uyu muhanda uragoye."


Musenyeri Smaragde Mbonyintege yibukije abafite ubumuga ko bashoboye abasaba kutarangazwa n’ ubumuga bafite

Uyu muhanda ufite nka kilometero imwe y’ uburebure washyizweho amatara ariko uracyagora abafite ubumuga bawunyuramo bagana kuri HVP Gatagara nk’ uko byagarutsweho na Musenyiri Smaragde.

Musenyeri Smaragde yabwiye abana bafite ubumuga ati “Nubwo mufite ubumuga ari ubw’ amaguru ari ubw’ amatwi, n’ ubundi butandukanye ndagira ngo mbabwire ko Padiri Fraipont yasanzwe mufite umutima n’ ubutumwa mugomba gusangiza iyi sosiyete yacu. Ndagira ngo mubimenye ntimurangazwe n’ ubumuga mufite, kuko Imana yabahaye umutima mugari, ubwenge, ubushake, n’ ubushobozi kandi Fraipont yabibabonyemo. Bana rero mukomere kandi Imana ibahe umugisha!”

Umuyobozi mukuru wa HVP Gatagara Frère Kizito Misago yavuze ko ikigo cyabo kita ku bafite ubumuga cyahinduwe ibitaro bikorana na mituelle de santé. Gusa ngo ntabwo barabona imbonerahamwe y’ imyanya y’ imirimo none bituma batagira abaganga b’ inzobere muri nzego zitandukanye.


Fr Kizito Misago uyobora HVP Gatagara imaze kugaba amashami 6

Fr Misago yasabye Leta ko ubufasha mu kwagura ibitaro byita kubafite ubumuga kuko ababagana ari benshi aho bakorera hakaba ari hato.

Minisitiri Shyaka yavuze ko ibyifuzo by’ umuyobozi mukuru wa Gatagara byumvikanye, kandi ko n’ ikifuzo cyo gutunganya umuhanda ugana kuri HVP Gatagara y’ I Nyanza Leta yacyumvise kandi ko isanzwe ifite gahunda yo kuwutunganya.

Yagize ati “Uyu muhanda mwavuze, ngira ngo murasa nk’ abasomye n’ ubundi muri gahunda zari zihari, hari hasanzwe hari ikifuzo ko uyu muhanda ugomba gukorwa. Gusa muzatugaye guhera kuko uko amikoro agenda aboneka niwo muvuduko tuzashyiramo, ariko turizera ko bitazatinda uyu muhanda ugashyirwamo kaka kaburimbo abantu bakajya bagenda neza cyane ko noneho hasigaye hagaragara”

Padiri Fraipont Ndagijimana ubusanzwe yitwaga Joseph Julien Adrien ariko yasabye ubwenegihugu bw’ u Rwanda ahitamo kwitwa Padiri Fraipont Joseph Ndagijimana.


Minisitiri Shyaka yavuze ko P.F.Ndagijimana yabaye Umunyarwanda mwiza

Minisitiri Shyaka yashimiye umuryango wabyaye Padiri Fraipont ukanamurera agaragaza ko uyu muzungu yabaye Umunyarwanda mwiza.

Ati “Nka Leta y’ u Rwanda turabashimira, ariko nubwo mwamubyaye mukamurera natwe ni uwacu murumva ko ari Ndagijimana. Turabashimira ko mwatubyariye mukaturerera uwabaye Umunyarwanda mwiza akadutangiriza ibikorwa byiza hatwese twishimira”


Abafashijwe na HVP Gatagara mu burezi no guhabwa inyunganirangingo bavuga ko byababereye inzira yo kwiyubaka mu gihe nta kizere cy’ubuzima bari bafite mbere yo gufashwa.

Ikigo Home de la Vierge des Pauvres (HVP) Gatagara cyashinzwe na Padiri Fraipont mu 1960 kimaze kuvura abafite ubumuga barenga ibihumbi 300 no kwigisha abagera ku bihumbi 150.

Magingo aya abana 1600 bafite ubumuga biga mu mashuri ya HVP Gatagara, naho abafite ubumuga 5000 bavurwa n’ ibitaro bya HVP Gatagara.


Marie Claire mwishywa wa Padiri Fraipont yasuye chapel Fraipont yubatse bwa mbere akanayisomeramo misa


Minisitiri Shyaka aganira n’ umuririmbyi Byumvuhore Jean Baptiste


Guverineri Gasana, Mgr Filipo Rukamba na Mgr Mbonyintege baganira na mwishywa wa Padiri Fraipont


Ibi birori byaranzwe n’ imvura nyinshi kuva bitagiye kugeza bisoje, hafatwa ifoto y’ urwibutso


INKURU ZA :
Tanga Igitekerezo
Ibitekerezo 2
Victoire Kuya 14-10-2019

Ibi bitaro bya HVP Gatagara byitabweho kuko bifasha abafite ubumuga benshi kandi bakongera kwigirira icyizere.

Gogo Kuya 13-10-2019

Leta turayisaba rwose ko uyu musaza twamushyira mu rwego rw’intwari z’u Rwanda kuko yitangiye u Rwanda. Kandi nawe ni Umunyarwanda

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...