AMAKURU

UKWEZI
pax

Abafite ubumuga barasaba kugira umusenateri ubahagarariye

Abafite ubumuga barasaba kugira umusenateri ubahagarariye
3-12-2019 saa 17:29' | By Nsanzimana Ernest | Yasomwe n'abantu 757 | Ibitekerezo

Abanyarwanda bafite ubumuga bashima intambwe imaze guterwa na Leta y’ u Rwanda mu kubahiriza uburenganzira bwabo, gusa bavuga ko hari ibindi bigikeneye gushyirwamo imbaraga nko kugira umusenateri ubahagarariye no kugira Minisitiri ubahagarariye.

GORILLA GAMES

Perezida w’ inama y’ igihugu y’ abafite ubumuga Niyomugabo Romalis yabitangarije mu karere ka Nyamagabe kuri uyu wa 03 Ukuboza 2019, ahizihirijwe umunsi mpuzamahanga w’ abafite ubumuga.

Yagize ati "Ubu turahagarariwe mu nteko, tukaba dufite n’ inama y’ igihugu y’ abantu bafite ubumuga, ariko twigiye imbere tukajya muri Sena, tukajya muri guverinoma, n’ ahandi henshi hafatirwa ibyemezo, ijwi ryacu riba ryigiye imbere kandi n’ ubuvugizi buba bwiyongereye, ibyo rero twifuza ko byagera n’ ahandi. Aho twamaze kugera niyo wareba mu Nteko Ishinga amategeko y’ Umuryango wa Afurika y’ iburasirazuba EALA naho usanga ijwi ry’ abafite ubumuga riri hejuru kubera ko dufitemo wa muntu uduhagarariye".

Umunyamabanga wa Leta muri Minisiteri y’ ubutegetsi bw’ igihugu ushinzwe Imibereho y’ Abaturage, Nyirarukundo Ingatienne avuga ko hari ibigenda bihinduka mu mibereho y’ abafite ubumuga birimo kuba batakigaragara ku muhanda basabiriza ari benshi.

Nyirarukundo yavuze ko inzu zitorohereza abafite ubumuga zikigaragara gusa ngo inyinshi ni izubatswe kera ati " Ntabwo twazikubita hasi zose ariko inzu zigenda zubakwa zishyirwamo inzira z’ abafite ubumuga. Byaratangiye cyane cyane ku zikenerwa cyane nk’ inzu ku Leta n’ amavuriro".

Yakanguriye abafite ubumuga gufata iya mbere mu gusaba ko uburenganzira bwabo bwubahirizwa ati "Nimwebwe ba mbere mugomba guhaguruka mugaharanira uburenganzira bwanyu kuko uburenganzira buraharanirwa. Umuntu ukwimye uburenganzira bwawe nk’ umuntu ufite ubumuga ugomba kumubwira ngo simfite urugingo ariko mfite igihugu. Mugomba kubivuga uguhaye serivise mbi akabibazwa kandi akabihanirwa".


Nyirarukundo Ingatienne

Nyirarukundo yavuze ko muri gahunda ya guverinoma y’ imyaka 7 irimo gushyirwa mu bikorwa kuva muri 2017- 2024, abafite ubumuga naho batekerejweho. Yatanze urugero kuri gahunda y’ uburezi budaheza asaba ababyeyi ko bagomba gukora ibishoboka byose umwana babyaye afite ubumuga akajyanwa ku ishuri, mwarimu akaba ariwe ugaragaza ko iryo shuri ridafite ubushobozi bwo kwigisha uwo mwana.

Mu bindi harimo korohereza abafite ubumuga kubona ubwisungane mu kwivuza no kubona insimburangingo. Ati "Turaharanira kugira ngo bigerweho kandi ibiganiro biragenda neza".

Umuyobozi wa Komisiyo y’ igihugu y’ uburenganzira bwa muntu Nirere Madeline yavuze ko kwizihiza umunsi mpuzamahanga w’ abafite ubumuga ari ishema ku Rwanda.

Ati "Kwizihiza uyu munsi ni ishema ku gihugu cyacu. Itegeko nshinga rivuga ko abanyarwanda bose bavuka bangana ko kubavangura ari icyaha gihanwa n’ amategeko."

Yashimye abamugariye ku rugamba rwo kubohora igihugu avuga ko kimwe n’ abandi banyarwanda bose bafite ubumuga guverinoma y’ u Rwanda izakomeza guharanira ko bagira imibereho myiza binyuze mu ngamba Leta igenda ifata zirimo no gushyiraho inzego zihagarariye abafite ubumuga.

Ati " Izo ngamba zose ntidushidikanya ko zahinduye imibereho y’ abafite ubumuga. Abafite ubumuga barashoboye kuko aba afite ubumuga ku rugingo rumwe ariko ahandi ingingo zikora".

Mu kwizihiza umunsi mpuzamahanga w’ abafite ubumuga, bamwe muri bo bahawe insimburangingo zigizwe n’ amagare y’ abafite ubumuga n’ inkoni zera zifasha abafite ubumuga bwo kutabona bakabasha kugenda.

Umuyobozi w’ ihuriro ry’ abafite ubumuga bwo kutabona Dr Kanimba Donatille asaba ko Leta y’ u Rwanda yashyira umukono ku masezerano ya Marrakesh atanga uburenganzira bwo gusemura ibihangano bigashyirwa mu majwi no mu nyandiko y’ abatabona izwi nka ’Braille’.

Mu Rwanda habarurwa abantu barenga ibihumbi 400 bafite ubumuga butandukanye, biganjemo abafite ubumuga bw’ ingingo.


Niyomugabo Romalis Perezida wa NCPD


INKURU ZA :
Tanga Igitekerezo
Ibitekerezo
canal Rwanda
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...