konka coffee
KONKA

AMAKURU

UKWEZI
Minijust

Kinyinya: Amasibo ku mudugudu yitezweho guca burundu umuco wo gutekinika

Kinyinya: Amasibo ku mudugudu yitezweho guca burundu umuco wo gutekinika
12-03-2019 saa 08:05' | By Nsanzimana Ernest | Yasomwe n'abantu 722 | Ibitekerezo 1

Amasibo yo ku midugudu mu Murenge wa Kinyinya , akarere ka Gasabo yasabwe kuba ku isonga mu guca burundu umuco mubi wakunze kuvugwa mu nzego z’ibanze wo gutanga amakuru atari yo uzwi nno gutekinika.

Babisabwe kuri iki Cyumweru ubwo amasibo yo ku midugudu muri uwo murenge yahigaga ibyo azageraho muri uyu mwaka.

Amasibo ni urwego rw’ibanze rugizwe n’ingo 20 rwatangiye gukora umwaka ushize. Uru rwego rwashyizweho hagamijwe guhuriza abaturage hamwe ku rwego rwo hasi bakaganira ku bibazo bafite bakabaishakira ibisubizo, ibikeneye ubufasha bikamenyekana kare.

Nyiramana Solange umwe mu bayobozi b’Isibo mu mudugudu wa Muhororo mu Kagali ka Kagugu, yavuze ko mu gihe gito bamaze bakora babonye akamaro k’isibo.

Yatanze urugero ko umwaka ushize mu Isibo ayobora bari biyemeje gusubiza abana batiga mu ishuri, kandi ngo babigezeho kuko hari bane bamaze gusubizwayo.

Nsanganiyumwami Léonard utuye mu mudugudu wa Gicikiza muri Kagugu, yavuze ko amasibo yatumye igihe habaye ikibazo amakuru amenyekana kare.

Ati “Hari igihe ibibazo byageraga ku mudugudu bitinze. Nk’ibijyanye n’abinjiye n’abasohotse mu mudugudu ugasanga biratinze kuko umudugudu wabaga uyobowe n’abantu bake ariko kubera amasibo umudugudu usigaye urimo abayobozi bagera kuri 20.”

Umunyamabanga Nshingwabikorwa w’akagali ka Kagugu, Mugabo Daniel yashimangiye ko amakuru basigaye bayabonera igihe kandi yizewe.

Ati “Tekinike zavugwaga mu nzego z’ibanze zigiye kugabanyuka. Ubu biroroshye, ntabwo tekiniki zizongera kugaragara kuko isibo ni ingo 20, rero izo ngo ziyoborwa n’abantu bareze umwe kubona amakuru yihuse bizajya bitworohera.”

Yavuze ko isibo ari umuyoboro bagiye kujya banyuzamo gahunda za Leta byaba kurwanya imirire mibi, kurwanya ibiyobyabwenge abana bata ishuri n’ibindi.

Umunyamabanga Nshingwabikorwa w’Umurenge wa Kinyinya Umuhoza Rwabukumba yemeza ko amasibo azafasha ubuyobozi kujya bubona amakuru yizewe, bice burundu umuco wo gutekinika wakunze kuvugwa mu nzego z’ibanze.

Ati “Uburyo isibo ari ntoya biragoye kubeshya kuko ni abaturage bake . Uwo muco tugenda tuwuca n’ubusanzwe ntabwo ugihari cyane ariko n’udusigisigi dusigaye tuzarangirira mu masibo.”

Yavuze ko icyo bifuza ku baturage cyane ari ubufasha mu gusigasira isuku n’umutekano nk’imwe mu nkingi y’iterambere.

Ubuyobozi buvuga ko kuva amasibo yatangira, byanagize uruhare mu bukangurambaga, bikongera ubwitabire bw’abaturage mu miganda, mu nteko z’abaturage, inama n’ibindi.


INKURU ZA :
Tanga Igitekerezo
Ibitekerezo 1
nzabonimana gervais Kuya 12-03-2019

kinyinya bibakomereze aho kuko igikorwacyogu subiza abanakwishuri icyiza kbx

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...