AMAKURU

UKWEZI
ubumwe

Kagame yakiriye indahiro z’ abasenateri, ababwira ko inshingano yabo atari ugutora YEGO na OYA gusa

Kagame yakiriye indahiro z’ abasenateri, ababwira ko inshingano yabo atari ugutora YEGO na OYA gusa
17-10-2019 saa 17:23' | By Nsanzimana Ernest | Yasomwe n'abantu 793 | Ibitekerezo

Perezida Kagame yakiriye indahiro z’ abayobozi bashya barimo n’ abasenateri baherutse gutorwa no gushyirwaho by’ umwihariko abwira abasenateri ko inshingano yabo atari ugutora YEGO na OYA ku mategeko bagezwaho ko ahubwo ari ukureba ko imibereyo y’ Abanyarwanda ihinduka igana aheza.

Ni mu muhango wabereye mu ngoro y’ inteko ishinga amategeko ku Kimihurura kuri uyu wa 17 Ukwakira 2019.

Muri uyu muhango hatowe Perezida mushya wa Sena usimbura Bernard Makuza ucyuye igihe. Uwatowe ni Dr Iyamuremye Augustin.

Dr Iyamuremye amaze gutorwa yagize ati “ Mbikuye ku mutima ndagira ngo mbashimire icyizere mwongeye kungirira mukangira mu basenateri Itegeko Nshinga ribahera ububasha. Icyo nabizeza ni uko ntazabatenguha. Muri uyu mwanya ndagira ngo nshimire abasenateri hamwe na bagenzi banjye bamaze kudushyira muri Biro ya Sena, ni inshingano iremereye tudashobora gusoza buri musenateri ataduteye inkunga ye kandi ku buryo butaziguye.”

Ba Visi Perezida ba Sena batowe ni Mukabaramba Alvera ushinzwe imari n’ abakozi na Nyirasafari Esperance ushinzwe iby’amategeko no kugenzura ibikorwa bya Guverinoma, yari usanzwe ari Minisitiri w’Umuco na Siporo.

Perezida Kagame yabwiye abayobozi barahiye ko gukorera igihugu ari ishema bikaba n’ amahirwe yo gukoresha neza kuko ibiri muri ayo mahirwe ari inshingano zirenze gukora akazi kuko harimo gufata ibyemezo bifitiye Abanyarwanda bose akamaro no mu gushimangira ubumwe bw’ Abanyarwanda.

Perezida Kagame yavuze ko ubuyobozi butanga ububasha , avuga ko ubwo bubasha buba bukwiye gukoreshwa neza kugira ngo izo nshingano nazo zirangire neza.

Yagize ati "Ababahisemo bashobora kuba barashingiye ku bunararibonye bababonyemo harimo kuba inyangamugayo. Akaba arinayo mpamvu Abanyarwanda babatezeho byinshi. Baziko ibyo byose mufite muzabikoresha neza mu guhindura imibereho yabo ikaba imibereho myiza".

Yunzemo ati “Bizabasaba nanone kubegera mukamenya ibibazo bahura nabyo kugira ngo mutange ibisubizo byabo, cyangwa inama y’ uko byakemurwa n’ ibindi byose bizaba bibaye ngombwa”

Yakomeje abwira abasenateri ati “Umurimo wanyu rero ntabwo ari gutorwa no gutora gusa, YEGO cyangwa OYA ku mategeko abagezwaho ahubwo ni ukureba ko Abanyarwanda babona ibyo bakeneye kandi bakwiye kugira ngo bagire ubuzima bwiza muri iyo nzira y’ ibikorwa byose muzaba mukora”

Perezida Kagame yabwiye abandi barahiye barimo Dr Kayitesi Usta , Umuyobozi wa RGB na Dr Nibishaka Emmanuel umwungirije na Maj Gen Bayingana Emmanuel, Umugaba Mukuru w’Ingabo zirwanira mu kirere ko imirimo yose ishingiye ku mutekano. Ngo nubwo ifite abayishinzwe ku buryo bw’ umwihariko ariko ireba buri wese.

Yakomeje avuga ko politiki nziza n’ imiyoborere myiza aribyo bigejeje u Rwanda aho rugeze ubu ati “Ntabwo turagera aho tujya ariko turi mu nzira nziza. Ni ngombwa rero ko dukomeza kubyishyiramo tukumva ko ari ibyacu kandi tukabishyiramo imbaraga zose dufite”.

Perezida Kagame yasoje ijambo rye yifuriza imirimo myiza abarahiye anabizeza ubufatanye mu bishoboka byose.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...