AMAKURU

UKWEZI
cheno 2020

Impuzamakoperative n’Amahuriro y’abahinzi bishobora gukurwaho kuko bituma ibiribwa bihenda

Impuzamakoperative n’Amahuriro y’abahinzi bishobora gukurwaho kuko bituma ibiribwa bihenda
22-01-2020 saa 02:12' | By Nsanzimana Ernest | Yasomwe n'abantu 2621 | Ibitekerezo 3

Minisitiri w’Intebe w’u Rwanda Dr Edouard Ngirente akemanga umumaro w’impuzamakoperative(federation) n’ amahuriro y’amakoperative(union) mu buhinzi akibaza niba koperative idashobora gukora ngo itere imbere bitanyuze muri aya matsinda cyane ko ngo hari aho atuma ibiciro bya bimwe mu biribwa bizamuka.

Ikigo cy’Igihugu RCA gishinzwe guteza imbere amakoperative kivuga ko impuzamakoperative n’Ihuriro ry’amakoperative bikwiye kubaho ari uko bikora ishoramari ryungukira abanyamuryango.

Byakomojweho kuri uyu wa 21 Mutarama 2020, ubwo Minisitiri w’Intebe Edouard Ngirente uri mu ruzinduko rw’akazi mu Ntara y’ Amajyepfo yasuraga Koperative y’abahinzi b’umuceri ikorera mu gishanga cya Ngiryi mu karere ka Gisagara.

Dr Ngirente yari kumwe na Minisitiri w’Ubuhinzi n’ubworozi Geraldine Mukeshimana, Minisitiri w’ubuzima Dr Diane Gashumba, Minisitiri mu biro bya Minisitiri w’ Intebe ushinzwe inama y’abaminisitiri Kayisire Marie Solange, Minisitiri w’ibikorwaremezo amb. Claver Gatete, Umunyamabanga wa Leta muri Minisiteri y’Ubutegetsi bw’igihugu ushinzwe imibereho myiza y’abaturage Ingatienne Nyirarukundo na Guverineri w’Intara y’Amajyepfo.

Mu mwaka ushize wa 2019, ihuriro ry’abahinzi b’umuceri ku rwego rw’igihugu ryinjije arenga miliyoni 14 ku avuye ku mafaranga 2 akatwa buri muhinzi kuri buri kilo cy’umuceri yejeje.

Umuyobozi waryo avuga ko ayo mafaranga yakoreshejwe mu guhugura amakoperative y’abahinzi b’umuceri,kubaka ikigo cy’amahugurwa, kubaka amacumbi na Bar Resto, ndetse ngo bafite intumbero yo kubaka salle y’inama.

Minisitiri w’ Intebe yakemanze kuba umuturage akatwa amafaranga yo kubaka salle y’inama n’amacumbi.

Ati “Ibyo ni inshingano za union koko? Kwirirwa mukata umuceri mwubaka amacumbi?”.

Umuyobozi w’Ikigo cy’igihugu gishinzwe guteza imbere Amakoperative RCA, Prof. Harelimana Jean Bosco yavuze ko ihuriro ry’amakoperative ryagombye kubaho rifite ibikorwa by’ubucuruzi bibyara inyungu nyinshi yongera igasubira hasi ku munyamuryango wa koperative.

Ati “Ibi ngibi rero byo kuba hagati na hagati(intermediate) bibyara kugira abakozi babiri bafite ubumenyi bumwe bakora bimwe(duplication) ugasanga agoronome ufite ubushobozi bungana n’ ubw’uwa koperative na union iramufite bakaba babiri”.


Dr Ngirente ubwo yaganiraga n’abahinzi bo mu gishanga cya Ngiryi gikora ku mirenge ya Musha na Ndora

Dr Ngirente agaragaza ko atumva ukuntu koperative igira agoronome, umurenge ukagira agoronome n’ akarere kakagira abagoronome nka batanu hanyuma bikarenga hakabaho n’agoronome uhembwa n’umuturage.

Yagize ati “Icyo nanavugaga ahubwo goronome usanzwe wa Leta, abo duhemba nka guverinoma agoronome w’umurenge arahari, agoronome w’ igishanga arahari, agoronome wa RCA arahari, n’uw’akarere, akarere ko kagira nka batanu, abo bagoronome bose twongeraho n’abandi bajya guhembwa n’umuturage kubera iki?

Minisitiri w’Intebe avuga ko iyi mikorere ituma ibiciro by’ibiribwa byo mu Rwanda bihenda ugereranyije n’ibyo hanze yarwo.

Ati “Icyo byongera ni ikiguzi cy’umuceri tugurisha mu Rwanda. Birangira umuceri wacu uhenda kurusha umuceri uturutse ahandi hantu. Kubera ubwo bufaranga tugenda dukata twongera ku kilo bikarangira umuceri w’u Rwanda ugura menshi kurusha uw’abandi bantu”.

Abanyamuryango ba koperative COPRORIZ ihinga umuceri mu gishanga cya Ngiryi mu karere ka Gisagara baganiriye n’Ikinyamakuru UKWEZI bavuze ko kuba bari Federasiyo y’abahinzi b’umuceri bakaba no muri Union y’abahinzi bawo ntacyo bibamariye.

Perezida w’iyi koperative (COPRORIZ Ngiryi) yavuze ko kuri buri kilo cy’umuceri abahinzi bejeje bakatwa ifaranga rimwe rikajya muri federation, union nayo ikabakata amafaranga abiri kuri buri kilo bejeje.

Perezida w’iyi koperative ya COPRORIZ Ngiryi ifite abanyamuryango barenga 790 avuga ko kuba muri Federasiyo na Union bibafitiye umumaro kuko bituma bakorerwa ubuvugizi. Yatanze ingero zo kuba barahuye n’ibiza bakishyurwa na radiant bafashemo ubwishingizi, no kuba igiciro cy’umuceri ku muhinzi cyariyongereho amafaranga 20.

Minisitiri w’ Intebe Dr Edouard Ngirente yamusubije ko abavuga ko aribo bakoze ubuvugizi kuri ibi bibazo ngo bikemuke babeshya.

Ati “Kugira ngo ubwishingizi bubishyure ibyangijwe n’ibiza Leta yatanze 40%, naho kugira ngo igiciro cy’umuceri ku muhinzi kiyongereho amafaranga 20 byakozwe na guverinoma”.

Prof. HARERIMANA Jean Bosco yavuze ko nk’ ikigo cy’igihugu gishinzwe guteza imbere amakoperative bagiye gusuzuma imikorere y’amafederasiyo na amahuriro by’amakoperative y’abahinzi. Iyo bazasanga idafite ibikorwa bibyara inyungu ngo isubire hasi ku muturage ishobora kuzavanwaho.


INKURU ZA :
Tanga Igitekerezo
Ibitekerezo 3
twagirimana j bosco Kuya 29-01-2020

mugihe amakoperative ayobowe nabantu batazi koperative icyo aricyo bigomba gutera ikibazo abanyamuryango ama union na federation confederation haka gobye kuyoboramo na bantu bize cooperative ndetse na rca kuko byafasha iterambere ryama cooperative ndetse nabanyamuryango

NIYITEGEKA Samson Kuya 24-01-2020

Twasomye inkuru mwanditse, ariko reka tugire ibitekerezo tuyitangaho Mu buryo bikurikira:
1)Imyubakire y’inzego z’amakoperative yashingiye Ku itegeko kandi ni umurongo mpuzamahanga Ku ISI.
2) Inshingano z’ayo mahuriro n’impuzamahuriro zikubiye Mu ngingo ya 19 y’itegeko rigenga amakoperative mu Rwanda nimero 50/2007 nkuko ryavuguruwe kugeza Ubu.
3)Kutumva akamaro kinzego zavuzwe haruguru ni Mu gihe mwasuzuma mugasanga bakora ibinyuranye.
Abazasenya izo nzego, ntibazatinda kubona ingaruka zo gukora ibyo bishakiye kw’amakoperative y’ibanze yatinyaga ijisho ryo kugenzurwa nayo mahuriro cyangwa impuzamahuriro bibari hafi, mu gihe RCA ihagera byaracitse!
4)Ukutagira ibikorwa binini by’ishoramari biterwa n’ubushobozi bucye bw’imari idahagije. Ibyo bikagaragazwa n’uko Mu itegurwa ryingengo y’imari n’iteganyamigambi usanga hari byinshi byo gukorwa nyamara imari ikaba nke.
Muzarebe igikorwa cy’ubuhinzi cyungura abanyenganda zitunganya ibikomoka kuribwo kuruta bene bwo.
Koko imisanzu yo kubaka izo nzego ikubiye mu gishoro nyamara biracyitiranywa n’umutwaro ukatwa abahinzi!!
6)Ihinduka ry’ihuriro riterwa na byinshi:
* Nkurugero muzasesengure ikinyuranyo cyigiciro fatizo cy,umuceri wa 2019B n’igiciro cya 2020A mubigereranye nicyo muri 2019A, muzamenya ukuri kw’indi nkuru izaba ifite umutwe(title) inyursnye niyo mwanditse.
Murakoze kwakira ibitekerezo byanjye nk’umwe mu ntore z’INDEMYABUKUNGU.

rwema Kuya 23-01-2020

ntabwo bariya bashyizeho izo federation bazivanaho kuko niho barira,naho guhenda kw’ibiribwa byo bizakomeza kuzamuka,uzarebe aho ibirayi bituruka,umenye niba washyiramo intoki ntizishye,ahantu hose hashobora guturuka imibereho y’umuturage harakomye

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...