AMAKURU

UKWEZI
Canal+ christmax

Gatsibo : Rwabuze gica muri College APECOM, abarishinze bariye karungu kubw’umukire ushaka kuribanyaga

Gatsibo : Rwabuze gica muri College APECOM, abarishinze bariye karungu kubw’umukire ushaka kuribanyaga
23-11-2020 saa 15:32' | By UKWEZI | Yasomwe n'abantu 3499 | Ibitekerezo

Ababyeyi bagize Umuryango mugari w’abashinze ishuri rya College APECOM riherereye mu kagari ka Gakenke mu Murenge wa Kiramuruzi Akarere ka Gatsibo ntibavuga rumwe n’abahoze ari abayobozi b’Inama y’Ubutetetsi yaryo barihayemo ingwate umwe mu banyamuryango bagamije kuryigarurira.

Iri shuri rya College APECOM [Association de Parent Pour Education Commune a Murambi], ryatangijwe mu 1986 n’abahoze ari ababyeyi bari batuye mu yahoze ari Komine Murambi, nyuma yo kubona ko muri aka gace abana baho batigaga kubera kubura aho biga.

Bitewe n’amateka yaranze igihugu y’ivanguramoko , wasangaga muri aka gace kahoze kitwa Ubuganza hatsindamo n’abanyeshuri babiri mu mwaka dore ko abenshi bahezwaga mu burezi, ibi rero biri mu byatumye ababyeyi bo muri aka gace bihuriza hamwe batangiza ishuri ryabo.

College APECOM yamamaye cyane mu myaka ya mbere gato ya Jonoside yakorewe Abatutsi mu 1994, ndetse na nyuma yaho ryongera kwiyubaka kugeza ubwo nko muri za 2000 ryabaga rifite abana bagera ku 1000.

Ryaragambaniwe…..

Uko iminsi yagendaga ishira, APECOM yatangiye kujya mu bibazo ahanini ngo byaterwaga n’ubuyobizi bw’ishuri bwariho mu myaka ya 2000 bufatanyije n’abari bagize Inama y’Ubutegetsi babaga barangajwe imbere n’uwitwa Rwigamba Célestin.

Ibibazo bishingiye ku mutungo byakururwaga n’itangwa ry’amasoko ririmo uburiganya, ndetse n’ibindi bibazo byatangiye kugariza iri shuri ndetse riza gufunga imiryango mu 2018, ku mpamvu ubuyobozi bwasobanuye ko ari iz’uko abanyeshuri babaye bake.

Uyu Rwigamba wayoboraga Inama y’Ubutegetsi ngo yageze aho ajya abwira umuyobozi gutanga isoko ryo kugemura ibiribwa kugeza n’aho nk’umufuka w’umuceri ugura ibihumbi 50Frw bawugura ibihumbi 80Frw.

Ibi bibazo byakomeje gukura kugeza ubwo ishuri ryafunze imiryango ariko rifungwa ribereyemo ideni uwitwa Hategekimana François-Xavier.

Hategekimana [nawe ni umunyamuryango wa APECOM kuko umubyeyi we ari mu bashinze iri shuri], vuga ko inama y’Abanyamuryango yahuye n’ikibazo cy’amikoro kuko icyo gihe ishuri ryari rigiye gutezwa cyamunara kuko ryari ribereyemo umwenda uwitwa Nyiringango Emmanuel [uyu nawe ni umunyamuryango ndetse kuri ubu niwe muyobozi].

Hategekimana yagurije ishuri amafaranga miliyoni 30Frw, bahise bamuha ingwate y’igice cy’ishuri [cyari kigizwe n’inyubako eshatu, amashuri atandatu mato,indi irimo amashuri abiri Manini], ariko nyuma amafaranga yo kwishyura aza kubura noneho uyu mugabo ahabwa aha hantu.

Mu kiganiro na UKWEZI yavuze ko “Amafaranga yo kunyishyura yarabuze bakora inama rusange, yabaye tariki 3 Nzeri 2017, bajya gusinyira imbere ya Noteri w’Umurenge bemeza ko mpawe iyo ngwate mpita mpabwa icyangombwa cy’ubutaka.”

Ibijyanye n’iki cyangombwa bisobanurwa mu bundi n’abanyamuryango ariko usanga bahuza n’abayobora Inama y’Ubutegetsi kuva mu 2019.

Umuyobozi w’Inama y’Ubutegetsi bwa APECOM [yatowe tariki 17 Kanama 2019], Nyiringango Emmanuel, avuga ko komite yamubanjirije yitwaje ikibazo ishuri ryari rimaze kujyamo maze batanga igice cyaryo mu buryo bunyuranyije n’amategeko.

Uyu muyobozi ntabwo yemera ko igice cy’iri shuri cyahawe Hategekimana ahubwo avuga ko hakozwe amanyanga n’abari bagize komite y’Inama y’Ubutegetsi aribo Rwigamba Célestin, Gapira Aloys ndetse n’uwari umuyobozi w’Ishuri Sekanyange Jean Leonard.

Ati “Ntabwo batekerezaga bwa bugure, ahubwo bashakaga kwigarurira iki kigo kugira ngo bazakigire icyabo abandi banyamuryango batabizi. Njyewe ntowe narabibajije byose uko byagenze numva ni amanyanga yakozwe hibwa umutungo wa APECOM.”

Abanyamuryango bariye karungu…

Abanyamuryango ntibemeranya na gato iyi ngingo yo kuba igice kimwe cy’iri shuri cyahawe uriya mugabo Hategekimana wabagurije amafaranga, basaba ko ubuyobozi bwabafasha bukabasubiza ahantu habo kuko hatanzwe mu buryo bw’uburiganya n’akagambane gakomeye.

Bavuga ko n’ubwo ababahagarariye bavuga ko ari miliyoni 30Frw ariko ayo bazi bagurijwe na Hategekimana ari miliyoni 20Frw ari nazo bazi nk’inteko rusange gusa ngo n’ubwo ariko bimeze gutyo aho hantu ni hanini cyane ku buryo hatagurwa n’ayo mafaranga.

Ni umwenda bemera ndetse bakavuga ko batigeze babura ubushobozi bwo kuwishyura kuko ishuri n’ubwo ryafunze ariko rifite umushoramari urikodesha miliyoni 1Frw ku kwezi bityo bakaba bumva ayo mafaranga yakwifashisha mu kwishyura ziriya miliyoni 20Frw babereyemo Hategekimana.

Karama Pierre watangiranye n’iri shuri ari umunyamuryango avuga ko ibyabaye byabateye urujijo kuko abayobozi babo bakoze uburiganya bukomeye bagatanga ishuri ry’abanyamuryango ari nayo mpamvu basaba leta gutesha agaciro iby’iyo ngwate yahawe Hategekimana.

Ati “Ishuri ryacu abaritanzeho ingwate nta burenganzira bari bafite, Inteko rusange niyo ifite uburenganzira bwo kwemeza niba ishuri ritezwa cyamunara kuko n’ibindi bintu byose bishingiye ku mutungo niyo ibyemeza.”

Umukecuru witwa Uwimana Immaculee nawe watangiranye n’iyubakwa ry’iri shuri yavuze ko atumva impamvu ishuri ryabo ryahabwa uriya mugabo kandi ari iry’abaturage bashinze bishyize hamwe.

Uwimana avuga ko aba bayobozi bakoze amanyanga akomeye bo nk’abanyamuryango batigeze bamenya ahubwo bashidutse komite iri kubabwira ko hari igice cy’ishuri cyahawe uyu mushoramari witwa Hategekimana.

Avuga ko komite iriho uyu munsi aribo bayitoye ndetse n’iyayibanjirije ari nayo yatanze igice cy’iri shuri, ikabikora batabizi.

Ati “Icyifuzo cyacu ni uko biriya bintu badukoreye ubanza bararebye ko turi abaturage nta bwenge tugira, bafashe ishuri ryacu bararitanga, turifuza ko byose biteshwa agaciro bazane amafaranga kaminuza ya UTAB yatwishyuye imyaka ibiri yose arishyura ziriya miliyoni 20Frw ubundi ishuri ryacu rive muri ibyo bibazo.”

Hari amakuru UKWEZI yaje kumenya ko Hategekimana washakaga kwegukana iri shuri ryose yari afite gahunda yo kurigurisha n’umushoramari ukomeye hano mu Rwanda kugira ngo aho ryubatse ahashyire kaminuza dore ko n’ubundi izi nyubako zaho zikodeshwa na Kaminuza ya UTAB, ari naho ishami ryayo rya Gatsibo rikorera.

Abanyamuryango bavuga ko icyifuzo cyabo ari uko abagize uruhare mu gushaka gutanga umutungo wa APECOM bose bakurikiranwa n’inzego z’ubuyobozi n’ubwo bigeze uwitwa Gapira Aloys yari yarafunzwe ndetse n’uwari ushinzwe ubutaka mu murenge wamufashije ariko bakaza gufungurwa mu buryo budasobanutse.

Imibare igaragaza ko ishuri rya College APECOM rifite abanyamuryango 102, ariko abariho bitabira ibikorwa byaryo ni 41. Muri Mutarama 2018, ubwo ryafungwaga ryari rifite abanyeshuri barenga mu 200.

Aba ni bamwe mu banyamuryango ba APECOM, baherutse gukora inteko rusange ikarangira isa n’aho ntacyo yanzuye dore ko abayitabiriye basabye ko ubutaka bwahawe Hategekimana bugaruzwa Uyu ni Hategekimana Francois Xavier wari urimo gutanga igitekerezo mu nama y’Inteko Rusange y’abanyamuryango ba APECOM

Nyiringango Emmanuel, kuri ubu niwe uyobora Inama y’Ubutegetsi ya APECOM
Uyu mubyeyi witwa Uwimana avuga ko ishuri batangije cyera rishaka kwigarurirwa n’umukire mu buryo budasobanutse
Karama Pierre uri mu batangiranye n’iri shuri avuga ko abayobozi bakoze amanyanga mu kuritangaho ingwate
Ahahoze ishuri rya College APECOM, hatangiye kumera ibyatsi kuko ritagikora muri iki gihe


INKURU ZA :
Tanga Igitekerezo
Ibitekerezo
canal Rwanda
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA