AMAKURU

UKWEZI
ubumwe

Akarere ka Gasabo katangiye gukorera muri etage nshya bamwe bayobera aho kahoze

Akarere ka Gasabo katangiye gukorera muri etage nshya bamwe bayobera aho kahoze
13-08-2019 saa 13:30' | By Nsanzimana Ernest | Yasomwe n'abantu 1886 | Ibitekerezo

Kuri uyu wa Kabili tariki 13 Kanama 2019 , ibiro by’ akarere ka Gasabo byimukiye mu nzu y’ amagorofa atandatu iherereye ku Gishushu mu murenge wa Remera, bamwe bayobera ahahoze ibiro by’ akarere ka Gasabo basanga nta bakozi n’ abayobozi bahari.

Akarere ka Gasabo kari kamaze imyaka myinshi gakorera mu nzu y’ igorofa iherereye hafi y’ ambasade y’ Abanyamerika mu murenge wa Kacyiru.

Kuri uyu wa Kabili hari abakeneye serivise ku biro by’ akarere ka Gasabo bajya kuri iyo nzu iherereye hafi y’ ambasade y’ Abanyamerika basanga imiryango irakinze.

Barimo umugabo wari wagiye ku biro by’ akarere ka Gasabo gusinyisha dosiye bamusaba ko yazasubirayo kuri uyu wa 13 Kanama ariko ntibibuka kumubwira ko bazaba bimukiye mu nzu nshya.

Uyu mugabo yabwiye RBA ko kuba yageze kuri iyi nzu akarere ka Gasabo kakoreragamo agasanga harakinze ari igihombo kuri we kuko byatumye akoresha amafaranga atari yateganyije gukoresha akanatakaza n’ umwanya.

Yagize ati “Nsanze ibiro bitarimo umuyobozi n’ umwe. Njye ntabwo bigeze babimenyesha, ibyo ari byose niba bari bafite na gahunda yo kwimuka bari kumbwira bati ku wa Kabili tuzaba twimuye ibiro”.

Yakomeje agira ati “Ibi biratwangiriza umwanya kubera ko umuntu aba afite byinshi akora, n’ amatike ya hato na hato umuntu aba atateganyije ugasanga rero biraguhombya aho kugira ngo bikungure”.

Kuri iyi nyubako yahoze ikorerwamo n’ akarere ka Gasabo abahageze kuri uyu wa Kabili bavuga ko nta tangazo rihari rigaragara ko ibiro by’ akarere byimukiye ku Gishushu.

Inzu iri ku Gishushu akarere ka Gasabo katangiye gukoreramo ni nini ugereranyije n’ aho kari gasanzwe gakorera.

Raymond Chrétien Mberabahizi, Umuyobozi wungirije w’ akarere ka Gasabo yavuze ko muri iyi nzu nshya batangiye gukoreramo bazatanga serivise nziza kurushaho kuko hari interinete yihuta cyane. Avuga ko iyi interinete izatuma gutanga serivise byihuta cyane bikongera no gukorera mu mucyo.

Iyi nzu nshya y’ akarere ka Gasabo ifite ibyumba byinshi birimo icyumba cy’ inama gifite ubushobozi bwo kwakira abantu barenga 500, ikagira parikingi ifite ubushobozi bwo kwakira imodoka 260.

Iyi nzu itangiye gukorerwa imaze gutwara miliyari 6 harimo miliyari imwe yaguzwe ibikoresho.

Izakorerwamo n’ abakozi b’ ikigo gishinzwe kwegereza iterambere abaturage LODA n’ abakozi n’ abayobozi b’ akarere ka Gasabo.


Iyi nzu niyo akarere ka Gasabo kakoreragamo


Iyi iriho ishusho y’ agaseke hejuru niyo batangiye gukoreramo kuri uyu wa Kabili


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...