AMAKURU

UKWEZI
ubumwe

Abasenateri Perezida Kagame yashyizeho nibo bagenzi babo bagiriye ikizere

Abasenateri Perezida Kagame yashyizeho nibo bagenzi babo bagiriye ikizere
17-10-2019 saa 19:08' | By Nsanzimana Ernest | Yasomwe n'abantu 1884 | Ibitekerezo

Abasenateri Perezida w’ u Rwanda Paul Kagame yashyizeho nibo bagenzi babo bagiriye ikizere babatorerwa kuyobora Sena y’ u Rwanda mu myaka itanu iri imbere.

Mu matora yabereye mu nteko ishinga amategeko kuri uyu wa 17 Ukwakira 2019, Dr Iyamuremye Augustin niwe wagiriwe ikizere na bagenzi be bamutorera kuba Perezida wa Sena y’ u Rwanda asimbura kuri uyu mwanya Bernard Makuza ucyuye igihe.

Ubwo abasenateri 20 binjiye mu nteko bari bamaze kurahira hakuriyeho gutora Biro ya Sena. Biro ya Sena igizwe na Perezida wa Sena n’ abamwungirije babiri.

Senateri Karangwa Chrysologue niwe wabimburiye abandi mu kwamamaza, yamamaza Dr Iyamuremye Augustin nk’umukandida aho yavuze ko abishingira kuba yarayoboye inzego zitandukanye mu gihugu, ndetse ko yanabaye umuhuza wa bose kandi muri byose.

Undi mukandida yari Senateri Zephirin Kalimba wavuze ko yiyamamaza ku giti cye, agasaba bagenzi be kumugirira ikizere bakamutorana ishyaka n’urukundo.

Amatora ya Perezida wa Sena yarangiye Dr Iyamuremye Augustin ariwe utsindiye kuba Perezida wa Sena y’u Rwanda muri manda y’imyaka 5 ku majwi 25 mu gihe Zephirin Kalimba bari bahataniye uyu mwanya we yagize ijwi rimwe.

Ku mwanya wa Visi Perezida wa Sena ushinzwe iby’amategeko no kugenzura ibikorwa bya Guverinoma, hamamajwe Nyirasafari Esperance na Senateri Hadija Ndangiza Murangwa.

Inteko itora yari igizwe n’ abasenateri 26. Nyirasafari Esperance wari usanzwe ari Minisitiri w’Umuco na Siporo, niwe watorewe kuba Visi Perezida wa Sena ushinzwe iby’amategeko no kugenzura ibikorwa bya Guverinomaaho agira amajwi 23 kuri 3 ya Hadija Ndangiza Murangwa.

Ku mwanya wa Visi Perezida ushinzwe imari n’abakozi, hamamajwe Mukabaramba Alvera na Umuhire Adrie. Mukabaramba niwe watowe ku majwi 22 mu gihe uwo bari bahatanye yagize amajwi 4.

Ingingo ya 80 y’Itegeko Nshinga ivuga ko Sena igizwe n’Abasenateri 26 barimo 8 bashyirwaho na Perezida wa Repubulika.

Tariki 20 Nzeri 2019 nibwo Perezida Kagame yashyizeho abasenateri bane batangirana na manda ya sena y’ u Rwanda mu basenateri 8 bashyirwaho na Perezida wa Repubulika.

Abasenateri bashyizweho na Perezida Kagame ni Dr Iyamuremye Augustin ari nawe watorewe kuba Perezida wa Sena, Mukabaramba Alvera watorewe kuba Visi Perezida wa Sena ushinzwe imari n’ abakozi, Nyirasafari Esperence watorewe kuba Visi Perezida wa Sena ushinzwe iby’amategeko no kugenzura ibikorwa bya Guverinoma ndetse na HABIYAKARE François.

Dr. Augustin Iyamuremye watore kuba Perezida wa Sena afite imyaka 73 y’amavuko, ni umugabo w’inararibonye muri politike y’u Rwanda. Ni inzobere mu buvuzi bw’amatungo. Yakoze imirimo ya politike ku butegetsi bwa Habyarimana Juvénal, Sindikubwaho Theodore, Pasteur Bizimungu na Perezida Paul Kagame.

Izindi nkuru zifitanye isano n’ iyi:

Perezida Kagame yashyizeho abasenateri bane, asigaje gushyiraho abandi bane

Kagame yakiriye indahiro z’ abasenateri, ababwira ko inshingano yabo atari ugutora YEGO na OYA gusa


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...