AMAKURU

UKWEZI
ubumwe

Nyanza: Nyuma yo gupfusha umugore, yashatse gufata uwa mukuru we bamutera ibuye arapfa

Nyanza: Nyuma yo gupfusha umugore, yashatse gufata uwa mukuru we bamutera ibuye arapfa
9-06-2019 saa 12:13' | By Chief Editor | Yasomwe n'abantu 5124 | Ibitekerezo

Habyarimana Evariste w’imyaka 44 y’amavuko, yiciwe mu rugo rwa mukuru we Kalisa Callixte w’imyaka 50 mu masaha y’igicuku cyo kuri uyu wa Gatandatu, ubuyobozi bukaba buvuga ko yagiye muri urwo rugo avuga ko ashaka gusambanya umugore wa mukuru we atazi ko ahari, undi akamugwa gitumo akamukubita ibuye bikamubiramo urupfu.

Ibi byabaye mu masaha ya saa tanu n’igice z’ijoro ryo kuri uyu wa Gatandatu tariki 8 Kamena 2019, mu mudugudu wa Muyebe, mu kagari ka Cyeru ko mu murenge wa Kibirizi mu karere ka Nyanza mu ntara y’Amajyepfo. Ngo si ubwa mbere nyakwigendera yari agerageje gushaka gufata ku ngufu umugore wa mukuru we nk’uko byemezwa n’ubuyobozi.

Umunyamabanga Nshingwabikorwa w’Umurenge wa Kibirizi, Habineza Jean Baptiste, yatangarije ikinyamakuru Ukwezi ko Habyarimana Evariste yari yasinze, akajya mu rugo rwa mukuru we azi ko adahari, aho ngo yagendaga avuga ko ashaka kurongora umugore wa mukuru we Kalisa Calliste. Uyu mukuru we ngo yamuguye gitumo amutera ibuye aramukomeretsa, bamujyana kwa muganga ariko ashiramo umwuka bataramugezayo.

Habineza Jean Baptiste avuga ko Habyarimana yari amaze amezi nk’atatu apfushije umugore, bishoboka ko kuba atarabyakira byaba byagize uruhare mu gutuma anywa cyane agasinda, hanyuma isindwe rikamwoshya kujya mu rugo rwa mukuru we, aho yagiye yivugisha ko ashaka kurarana n’uwo mugore we.

Ngo si ubwa mbere Habyarimana Evariste yari agerageje gushaka gufata ku ngufu umugore wa mukuru we, kuko ngo byigeze kubaho na mbere ariko ubuyobozi bukagerageza kubunga bikarangira.

Umunyamabanga Nshingwabikorwa w’Umurenge wa Kibirizi, avuga ko Kalisa Calliste yamaze gutabwa muri yombi na Polisi nayo ikaba igiye kumushyikiriza Urwego rw’Ubugenzacyaha (RIB) kugirango rukore akazi karwo. Umurambo wa nyakwigendera nawo wajyanywe ku bitaro bya Nyanza kugirango ukorerwe isuzuma.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...