AMAKURU

UKWEZI
ubumwe

Mudasobwa z’ abanyeshuri zibwa mu Rwanda zigurishwa muri Kongo

Mudasobwa z’ abanyeshuri zibwa mu Rwanda zigurishwa muri Kongo
12-06-2019 saa 19:28' | By Nsanzimana Ernest | Yasomwe n'abantu 1170 | Ibitekerezo

Polisi y’ u Rwanda ikorera mu ntara y’ amajyepfo yatangaje ko mudasobwa zagenewe abanyeshuri muri gahunda ya Onelaptop per child na Smart Classroom zibwa mu Rwanda ziguriswa muri Repubulika ya Demukarasi ya Kongo.

ACP Kajeguhakwa Jean Claude, Umuyobozi wa Polisi muri iyi ntara yatangaje ko hamaze kwibwa mudasobwa 636 mu turere twose tw’ intara y’ amajyepfo.

Harimo 66 zibwe mu karere ka Kamonyi, 186 zibwe mu karere ka Muhanga, 115 zibwe mu karere Ruhango, 35 zibwe mu karere ka Nyanza, 72 zibwe mu karere ka Huye, 49 zibwe mu karere ka Gisagara, 25 zibwe mu karere ka Nyamagabe na 88 zibwe mu karere ka Nyaruguru.

Abamaze gutabwa muri yombi bakekwaho kwiba izi mudasobwa ni 80 naho izimaze kugaruzwa ni 141.

ACP Kajeguhakwa mu kiganiro yahaye abayobozi b’ Akarere ka Gisagara n’ abafatanyabikorwa b’ akarere bari mu mwiherero yavuze ko igitiza umurindi ubu bujura ari ukutagira ururinzi buhamye.

Ati “Ugasanga ikigo kiriho izi mudasobwa kirindwa n’ umuzamu ufite ikiringiti. Bene uyu muzamu biba byoroshye kumusindisha agasinzira ubundi abiba bakiba”.

ACP Kajeguhakwa avuga ko Minisiteri y’ Uburezi na Polisi y’ u Rwanda bahagurukiye ikibazo cy’ ubujura bw’ izi mudasobwa.

Izi mudasobwa zihabwa abanyeshuri biga mu mashuri abanza n’ ayisumbuye mu rwego rwo kubafasha kwiga neza no kumenya gukoresha neza ikoranabuhanga.

ACP Kajeguhakwa ati “Twatahuye ko mudasobwa zibwa zigurishwa muri Kongo zigakorwamo ibyuma. Hari izafashwe ziragarurwa”.

Mu rwego rwo gufasha abanyeshuri mu bijyanye n’ ikoranabuhanga buri kigo cy’ ishuri kigomba kugira Smart Classroom. Polisi y’ u Rwanda mu ntara y’ amagepfo ivuga ko indi mpamvu ituma mudasobwa zibwa ariko ziba zitabitse neza.

Icyumba kibikwamo mudasobwa kigomba kuba gifite akabati zibikwamo kandi gafungwa neza n’ icyumba zibikwamo bikaba uko.

ACP Kajeguhakwa agaragaza ko byinshi mu bigo by’ amashuri byo mu ntara y’ amajyepfo bitabika mudasobwa mu buryo bukwiriye.

Gahunda ya Smart Classroom ni gahunda yatangiye muri 2016, ifite intego ko buri kigo cy’ ishuri kigira icyumba cya mudasobwa. Iyi gahunda yaje yunganira gahunda ya mudasobwa imwe ku mwana One laptop per child.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...