AMAKURU

UKWEZI
cheno 2020

‘Mu ishyamba rya Kaminuza ahatoraguwe umurambo hashyizwe irondo rihoraho’ Meya Sebutege

‘Mu ishyamba rya Kaminuza ahatoraguwe umurambo hashyizwe irondo rihoraho’ Meya Sebutege
31-12-2019 saa 10:18' | By Nsanzimana Ernest | Yasomwe n'abantu 1377 | Ibitekerezo

Umuyobozi w’Akarere ka Huye Ange Sebutege avuga ko mu ishyamba rya Kaminuza y’ u Rwanda ishyami rya Huye hafi y’ ahitwa kuri ‘gakondo’ no kuri ISAR umutekano waho wakajijwe nyuma y’ uko hatoraguwe umurambo abaturage bakagaragaza ko n’ ubusanzwe bahatinya.

Tariki 27 Ukuboza 2019 nibwo mu ishyamba riri mu murenge wa Ngoma ku muhanda uva ku Mukoni werekeza I Mpare habonetse umurambo w’ umusore utarahise amenyekana imyirondoro.

Kuri uyu wa 30 Ukuboza, Meya Sebutege yatangarije UKWEZI ko kuba muri ririya shyamba haratoraguwe umurambo bidasobanuye ko hari ikibazo cy’ umutekano muke, gusa ngo hongerewe irondo mu rwego rwo gukaza umutekano waho.

Yagize ati “Mu bijyanye n’ umutekano iyo habayeho incident report imwe ntabwo bigaragaza ko nta mutekano uhari. Ni ikibazo cyabaye habonetse umurambo ariko mu buryo busanzwe bwo gucunga umutekano wongerewe imbaraga hashirwa irondo rihoraho rigenzura umutekano hariya ariko nanone no gushaka amakuru y’ abo bagizi ba nabi bashobora kuba bihishe inyuma ya kiriya gikorwa”.

Abaturage biganjemo abamotari bakoresha uyu muhanda batangarije baherutse kudutangariza ko n’ ubusanzwe uyu muhanda bawutinga bahamya ko nta muntu upfa kuwunyuramo nyuma ya saa kumi n’ ebyiri z’ umugoroba kuko ahitwa ku iteme hepfo y’ ahari ivuriro rya Gakondo haba amabandi atega abantu akabambura.

Kinyogote Jean Pierre umwe mu bamotari bakoresha uyu muhanda yavuze ko uyu muhanda awutinya ndetse ngo hagize umugenzi umutega aranyura muri uyu muhanda nyuma ya saa kumi n’ ebyiri ntiyamutwara.

Yagize ati "Umutekano wo muri uyu muhanda ntabwo ari mwiza cyane, usanga hijimye ari ahantu mu ishyamba ntabwo hakwiye kunyurwa mu masaha arenze saa kumi n’ ebyiri za nimugoroba. Mu masaha ya saa kumi n’ ebyiri z’ umugoroba ntabwo nshobora kuhanyura njyewe".

Akomeza agira ati "Ikintu mbona cyakorwa ni uko wenda bashyiraho ariya matara yo ku muhanda akava epfo iriya akagera hano haruguru ku muhanda wa kaburimbo".

Umusore utuye i Mpare mu murenge wa Tumba yavuze ko uyu muhanda ari mubi kuko habamo abagizi ba nabi batega abagenzi bakahamburira. Ashimangira ko nta mumotari wakwemera kujya i Mpare saa mbili z’ umugoroba kubera ukuntu iri shyamba ritinyitse.

Ati "Mu myaka mfite ntabwo ari ubwa mbere hano birahahora, nk’ umugenzi akubwiye ngo njyana i Mpare saa mbili, saa tatu uratitira ntabwo ujyayo uravuga uti bwije batansinda hari h’ epfo, cyane cyane hari hepfo ku iteme niho hantu habi cyane. Ibyabaye ntabwo bitunguranye kuko twese hano turahatinya. Ubundi umuntu utaha i Mpare yitahira hakiri kare cyangwa mukamanuka muri benshi".

Icyifuzo cy’abaturage bakoresha uyu muhanda ni uko hashyirwa amatara gusa Meya Sebutege avuga ko muri uyu mwaka w’ ingengo y’ imari uzarangira muri Kamena 2020 gahunda yo gushyira amatara kuri uyu muhanda itateganyijwe.

Ati “Mu igenamigambi dufite muri uyu mwaka 2019/2020 ntabwo biri muri gahunda ariko byajya muri gahunda y’ igenamigambi ryo mu gihe kiri imbere”.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...