AMAKURU

UKWEZI
ubumwe

Meya wa Burera na REMA babusanyije mu mvugo ku byo basezeranyije abaturage bimuye ku kirwa

Meya wa Burera na REMA babusanyije mu mvugo ku byo basezeranyije abaturage bimuye ku kirwa
30-05-2019 saa 10:11' | By Nsanzimana Ernest | Yasomwe n'abantu 1722 | Ibitekerezo

Ubuzima bw’ abaturage bo mu miryango 84 yimuwe ku kirwa cya Bushungwe cyo mu kiyaga cya Burera mu myaka ibiri ishize buri mazi abira nyuma y’ uko bimuwe bizezwa ko bazabona amasambu yo guhinga amaso akaba yaraheze mu kirere.

Meya wa Burera Uwambajemariya Florence akomeje kubizeza ko amasambu basezeranyijwe bazayabona ariko REMA yafatanyije n’ aka karere mu mushinga wo kwimura abo baturage yabakuriye inzira ku murima.

Muri iyo miryango 84 yatujwe mu Murenge wa Rugarama, 76 niyo yubakiwe amazu mu mudugudu w’ ikitegererezo wo muri uwo murenge.

Aba baturage bavuga ko magingo aya bacyambuka ikiyaga buri munsi bajya ku kirwa guhingayo no gukorayo indi mirimo kuko ariho bafite amasambu. Bimuwe bizezwa ko ayo masambu bafite ku kirwa azagurwa bo bakigurira andi hakurya y’ ikiyaga.

Bafite impungenge ko habaye impanuka y’ ubwato hari imiryango yazima burundu.

Umwe muri bo ati “Iyo ari igihe cy’ ihinga tugenda umugore, umugabo, umwana, bamwe bagiye guhinga abandi bagiye kwahira. Kuko twambukana n’ imiryango yacu yose tuba dufite ubwoba kuko mu mazi habamo ibigwagwa byinshi.”.

Undi muturage yavuze ko iyo ari mu masha yo kujya mu kazi mu gitondo ubwato bukora nk’ amaturu ane.

Icyo bahurizaho ni ugusaba ubuyobozi ko ayo masambu yabo yagurwa bakabona amafaranga yo kugura amasambu aho bitazajya bibasaba kwambuka ikiyaga buri munsi.

Umuyobozi w’ Akarere ka Burera Uwambajemariya Florence avuga ko hari gahunda y’ uko ayo masambu abaturage bafite ku kirwa cya Bushungwe Leta izayagura abaturage bakabona amafaranga yo kugura aho bahinga.

Yabwiye Radio one ati “Leta binyuze muri REMA izagura ayo masambu habungwabungwe bishingiye ku nyigo yakozwe kandi izakomeza gukorwa”.

Nubwo Meya Uwambajemariya avuga ko hari gahunda yo kubonera abo baturage amafaranga yo kugura amasambu, REMA yafatanije n’ akarere kwimura aba baturage ivuga ko inka n’ amazu bahawe aribyo ngurane y’ ubutaka bwabo.

Umuyobozi wungirije wa REMA Munyazikwiye Faustin asanga kuba aba baturage bategereje kuri Leta amafaranga y’ ingurane y’ amasambu yabo ari nko gusabiriza.

Yagize ati “Iyo wimuwe ugahabwa ingurane, ni ukuvuga ngo ubwo butaka uba utakibufiteho uruhare. Iyo ngurane tuba tuvuga, ni izo nka bahawe zihabwa agaciro, ayo mazu bubakiwe ahabwa agaciro. Ntabwo bakomeza kumva ngo ibyo bakeneye byose bazabihabwa nk’ imfashanyo bagomba kwigishwa bagasobanurirwa nabo bakagira uruhare mu bibakorerwa bakagira n’ uruhare mu kuyobora ubuzima bwabo”.

Aba baturage bavuga ko mu myaka ibiri ishize aribwo bimuwe ku kirwa cya Bushungwe nyuma yo gusabwa kwishakira ibibanza bakubikirwa amazu. Bavuga ko bari babwiwe ko nyuma yo kwimurwa bazakomeza guhinga amasambu yabo mu gihe bategereje ko agurwa bakabona amafaranga yo kugura andi masambu ahadashobora gushyira ubuzima bwabo n’ ubwibidukikije mu kaga.

Ibyo bavuga bishimangirwa n’ ubuyobozi bw’ akarere ariko Ikigo cy’ Igihugu cy’ Ibidukikije REMA cyabakuriye inzira ku murima ngo babage bifashe.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...