AMAKURU

UKWEZI
ubumwe

Gishamvu: Bamwe mu baturage bakoresha imisarane ishobora gushyira ubuzima bwabo mu kaga

Gishamvu: Bamwe mu baturage bakoresha imisarane ishobora gushyira ubuzima  bwabo mu kaga
13-08-2019 saa 21:07' | By Nsanzimana Ernest | Yasomwe n'abantu 830 | Ibitekerezo

Mu murenge wa Gishamvu wo mu karere ka Huye, hari ingo zifite ubwiherero butubakiye. Abaturage bavuga ko impamvu bamwe muri badafite ubwiherero ari ukubera ubukene gusa ngo hari n’ abafite ikibazo cy’ imyumvire.

Mukaruyonza Vestine avuga ko we afite ubwiherero akongeraho ko abadafite ubwiherero Leta yabunganira bakabona isakaro kuko abenshi babiterwa n’ ubukene.

Yagize ati “Abadafite ubwiherero ni abapfakazi n’ abandi bantu batishoboye. Yego hariho abatabufite kubera ko batishoboye ariko hariho no gukena mu mutwe ariko nibo bake”.

Akomeza avuga ko kuba hari abadafite ubwiherero ari ikibazo gikomeye. Ati “Kuko imyanda ituruka kuri bwa bwiherero bwabo budahwitse yangiza byinshi ukabona iranduza imboga n’ ibindi bintu runaka. Abadafite ubwiherero inama nabagira ni uko bashyiraho akabo Leta ikabafasha kubona isakaro”.

Ntezimana Onesphore ati “Abadafite ubwiherero biterwa n’ ibibazo by’ ubushobozi buke, akaba yarabuze nk’ imbaraga zo kugira ngo abashe gucukura tuwalete”.

Ntezimana avuga ko agenekereje mu gace atuyemo muri buri ngo 10 harimo ebyiri zidafite ubwiherero.



Bumwe mu bwiherero bwo muri aka kagari ka Ryakibogo buratinze bukaba bwubatse ariko budasakaye.

Rucamurukiko Ibrahim avuga ko ubuyobozi bwari bwabasabye ko bacukura bakanubaka ubwiherero ubuyobozi bukazabaha isakaro ariko ngo barategereje baraheba.

Ati “Ubundi bari batubwiye ko tuzubaka ibikanka bakadusakarira ariko isakaro byaje guhinduka twararibuze. Mu nama no mu miganda bajyaga batubwira ngo bazadusakarira ntabwo babikoze”.

Rucamurukiko avuga ko mu mudugutu atuyemo abenshi ari abadafite ubwiherero bwujuje ibisabwa.

Mukarutabana Maria umwe mu baturage bo mu midugudu ya Kadahokwa na Gitwa badafite ubwiherero yabwiye UKWEZI ko iyo akeneye ubwiherero atira abaturanyi.

Mu baturage batuye muri aka gace ntawigeze atwemerera ko yiherera ku gasozi gusa hari ingo twageraga nk’ inyuma y’ inzu tugasanga hari umwanda ugenewe kuba mu murasane.

Umunyamabanga Nshingwabikorwa w’ Umurenge wa Gishamvu ntacyo aravuga kuri iki kibazo kuko inshuro zose twamuhamagaye atitabye telefone.

Mu baturage badafite ubwiherero harimo abari mu kiciro cya gatatu cy’ ubudehe. Aba nabo bavuga ko nubwo bashyizwe mu kiciro cya gatatu nabo ari abakene ku buryo badashobora kubona ubushobozi bwo kwiyubakira ubwiherero bwujuje ibisabwa. Ibi kandi byanagaragazwa n’ uko bamwe muri bo amazu babamo ashaje cyane bakaba batarabashije kuyivugururira.

Ubwiherero bwujuje ibisabwa bugomba kuba butinze neza, bwubakiye kandi buhomye neza, busakaye kandi bunapfundikirwa.


Bamwe mu badafite ubwiherero n’ amazu yabo arashaje cyane


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...