konka coffee
KONKA

AMAKURU

UKWEZI
Minijust

Dr Kayumba yabajije Nduhungirehe igisobanuro cyo kuba Perezida Kagame yarongeye kwambara gisirikare

Dr Kayumba yabajije Nduhungirehe igisobanuro cyo kuba Perezida Kagame yarongeye kwambara gisirikare
8-02-2019 saa 10:24' | By Nsanzimana Ernest | Yasomwe n'abantu 10767 | Ibitekerezo 2

Impuguke mu bya politiki akaba n’ umuseseguzi Dr Christopher Kayumba yabajije Umunyamabanga wa Leta muri Minisiteri y’ ububanyi n’ amahanga Amb. Olivier Nduhungirehe icyo bivuze kuba Perezida w’ u Rwanda Paul Kagame asigaye yambara imyenda y’ ingabo z’ u Rwanda kandi hari hashize imyaka 18 cyangwa 19 atayambara.

Kuva muri 2000 , ubwo Perezida Kagame yatorerwaga kuba Perezida w’ inzibacyuho ntiyongeye kwambara imyenda y’ ingabo z’ u Rwanda kugeza muri 2018.

Tariki 11 Ukuboza 2018 umunsi wo gusoza imyitozo Ingabo zigize Diviziyo ya gatatu ikorera mu Burengerazuba bw’u Rwanda zari zimazemo amezi atatu yahawe izina rya ‘Exercise Hard Punch III FTX 2018’ nibwo Perezida Kagame yageze i Gabiro aho imyitozo yabereye yambaye impuzankano ya gisirikare, imyambaro atari amenyerewemo.

Nanone kuri uyu wa 6 Gashyantare 2019, ubwo yaganiraga n’ abasirikare bakuru barenga 1000 I Gako nabwo Perezida Kagame yagaragaye yambaye imyenga ya gisirikare.

Ubwa mbere yari yambaye imyenda y’ abasirikare bashinzwe kurinda umukuru w’ igihugu, ubwa kabiri yari yambaye imyenda y’ abasirikare basanzwe.

Mu kiganiro cyatambutse kuri KT radio kuri uyu wa 7 Gashyantare 2019 cyavugaga k’ ukwishyirahamwe kw’ ibihugu bigize Umuryango wa Afurika y’ Iburasirazuba EAC, ku ngingo y’ umutekano nibwo Dr Kayumba yabajije impamvu Perezida Kagame asigaye yambara imyenda ya gisirikare, asaba n’ ubihuza no kuba hari umutwe wa P5 ukorera muri DRC bivuga ko ushaka kuzatera u Rwanda.

Yagize ati “Ariko muri biriya bya P5 na FDLR yazanzamuwe, u Rwanda rwiteguye gukora iki? Kuva Perezida Kagame yajya k’ ubuyobozi muri 2000 hari hashize imyaka 19 atarambara imyenda ya gisirikare. Ubu ngubu naramubonye cyagihe i Gabiro, n’ejobundi naramubonye ari i Gako bivuze iki?”

Yongeyeho ati “Minisiter(Nduhungirehe) ashobora kuba afite ikintu ashaka kutubwira, Minister ibyo ngibyo bivuze iki?”

Uyu musesenguzi yongeye ati “Perezida Kagame ntabwo ari umuntu ushaka kwifotoza, kandi muri iyo myaka 18 twagize intambara ya Kisangani iya mbere n’ iya 2 ntabwo yigeze ashyiramo uniform”

Amb. Nduhungirehe yagaragaje ko kuba Perezida Kagame asigaye yambara imyenda y’ ingabo z’ u Rwanda nta kibyihishe inyuma.

Ati “Iyo uniform ayambara kubera gahunda ziba zihari, muri gahunda y’ ingabo z’ u Rwanda agomba kwambara uniforme ye nk’ umugaba w’ ikirenga w’ ingabo. Ni gahunda ziba zihari ntabwo bijyanye n’ ibyo ngibyo uvuga.”

Nduhungirehe yakomeje agira ati “Ariko uko byagenda kose dufite ikibazo cy’ umutekano muri aka karere. Hari iriya mitwe yitwaje intwaro iri mu burasirazuba bwa Kongo, hari imiryango y’ uturere yahawe inshingano yo gufasha mu by’ umutekano. Muribuka ko FDLR yahawe amezi 6 ngo ibe yashyize intwaro hasi bitaba hagakoreshwa ingufu za gisirikare ntabwo byakozwe. Icyo gihe yari yabisabwe na SADEC na ICGGL”

Muri iki kiganiro Amb. Nduhungirehe yagaragaje ko u Rwanda rubangamiwe mu by’ umutekano ariko rwo rukaba ntawe rubangamiye. Yabikomoje ku kuba inyeshyamba zijya mu bindi bihugu zikahitoreza ariko mu Rwanda hakaba nta nyeshyamba zihacurira imigambi yo kugirira nabi ibindi bihugu.

Ibi yavuze biravuguruza ibyigeze kuvugwa ko mu nkambi ya Mahama (Kirehe) icumbikiye Abarundi, hakorerwa imyitozo n’ abashaka kuzatera u Burundi.


INKURU ZA :
Tanga Igitekerezo
Ibitekerezo 2
Franko Kuya 9-02-2019

Iki kibazo kirareba "Sisi wenyewe" Kayumba azakibarize Nyirubwite niho azabona igisubizo gikwiye.

kitegetse jean Kuya 8-02-2019

Ariko se u Rwanda ruzahora mu ntambara.Byose byatangiriye ku Rucunshu,ubwo Musinga yarwanaga na Rutarindwa,akamunesha agafata ubutegetsi ku ngufu.Ni ryari tuzagira amahoro arambye kweli?? Ko twese turi abakristu nibuze ku kigero cya 95%,ntabwo tuzi ko Yezu yasize adusabye gukundana,akatubuza kurwana??
Niba koko turi abakristu,izi coup d’état,izi ntambara,izi genocide zivahe??Umukristu nyakuri ntarwana,ntaronda amoko kandi ntiyicana.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...