AMAKURU

UKWEZI
ubumwe

Ruhango: Abaturage batewe ubwoba n’ urugomo rubera ahiswe ‘Muyurupfu’

Ruhango: Abaturage batewe ubwoba n’ urugomo rubera ahiswe ‘Muyurupfu’
20-11-2019 saa 17:01' | By Nsanzimana Ernest | Yasomwe n'abantu 4712 | Ibitekerezo 4

Bamwe mu batuye mu murenge wa Ruhango akagari ka Nyamagana, umudugudu wa Nyarusange akarere ka Ruhango bavuga ko batewe ubwo n’ agace kitwa Muyurupfu kuko hakorerwa ibikorwa by’ urugomo birimo kuhanywera ibiyobyabwenge no kuhamburira abagenzi amatelefone, amafaranga n’ amasakoshi.

Aha hantu hitwa Muyurupfu ni muri metero zitarenze 500 uvuye ku biro by’ akarere ka Ruhango utambikiye munsi y’ urwibutso rwa Jenoside yakorewe abatutsi.

Iki kibazo cy’ umutekano muke kigaragara aha hantu, ubuyobozi bw’ akarere ka Ruhango buvuga ko bukizi kandi ko butazakihanganira. Meya HABARUREMA avuga ko bagiye gukora ku buryo iki kibazo kigemuka burundu n’ izina ry’ aha hantu rigahinduka.

Byamana Stanislas, utuye hafi yo Muyurupfu avuga ko iyo abonye bwamwiriyeho akabona bigeze nka saa mbili z’ ijoro ashaka ahandi anyura kugira ngo atanyura Muyurupfu bakamwambura ibyo afite.


Byamana Stanislas avuga ko abonye bigeze saa mbili z’ ijoro atarataha yashaka ahandi anyura ariko ntanyure Muyurupfu

Akomeza avuga ko impamvu bahise Muyurupfu ari uko haba abantu bacuruza urumogi na Kanyaga, bakanabihanywera kandi bakambura abagenzi ibyo bafite.

Ubwo umunyamakuru wa UKWEZI yageraga Muyurupfu mu masaha ya kumi n’ imwe n’ igice z’ umugoroba kuri uyu wa 19 Ugushyingo 2019, yahasanze umusore wari uhahagaze. Hirya nko muri metero nka 50 hahagaze undi.

Aba basore bahise biruka ubwo babona Byamana ahingutse aza yegera aho umunyamakuru n’ umwe muri aba basore bari bahagaze. Ubwo twaganiraga na Byamana hari umusore wari wambaye imyenda y’ umukara twabonye agendagenda mu ishyamba ryo Muyurupfu Byamana ati “Nuriya nawe ni umwe muri ayo mabandi”.

Umwe mubanyura Muyurupfu bataha yabwiye UKWEZI ko abo basore bahategera bigeze kumwambura telefone. Uyu mugore avuga ko ikintu kibahangayikishije ari uko abo bagizi ba nabi bashimuta abakobwa bakabiba bakabasambanya.

Yagize ati “Nahanyuze ngira ngo ngere hirya ku kabari ngure akaburushete n’ agafanta kuko nari mvuye I Kabgayi bahanyamburira telefone nyibura nyireba bariruka”.


Muri iyi nzira no muri iri shyamba niho hitwa Muyurupfu

Uyu mubyeyi uri mu kigero cy’ imyaka 40 yakomeje agira ati “Umwe araza akagusuhuza nk’ umugenzi, undi bakaba bafitanye misiyo, ngo uriya aratwibye reka tumukurikire tubimwake, mwagerayo nawe bakakwiba noneho waba uri nk’ umukobwa bwo bakanagufata ku ngufu”.

Aba baturage bavuga ko icyo babona cyakorwa kigakemura iki kibazo ari uko Muyurupfu hashyirwa amatara n’ irondo rihoraho, kuko ngo polisi iraza igafata abo bantu ikabajyana ahitwa mu Ikebero bakazongera bakagaruka.

Umuyobozi w’ akarere ka Ruhango HABARUREMA Valens mu kiganiro akarere gaheruka kugira n’ abanyamakuru yavuze ko batajya bihanganira ikibazo cy’ umutekano muke. Avuga ko abantu bateza umutekano muke iyo bamenyekanye bafatatwa bagahanwa.

Ati “Hagomba guhinduka hakitwa aheza, aho kwitwa iryo zina Rupfu ngira ngo bahise gutyo kubera akajagari kakunze kuhagaragara kajyanye n’ ababa bitwara nabi b’ ibihazi. Icyo nakubwira gusa ni uko tutajya twihanganira abitwara nabi mu by’ umutekano iyo tubamenye kandi tubereyo no kubashaka”.


Meya Habarurema avuga ko ikibazo cy’ umutekano muke kiri Muyurupfu kigiye guhagurukirwa

Yakomeje agira ati “Ndaza kongera nganire n’ inzego z’ umutekano ndebe ikibazo cyaba gihari. Tugikemure tugifatire umwanzuro”.

Ibikorwa by’ ubugizi bwa nabi byatangiye kugaragara aha hantu muri 2002 nk’ uko bitangazwa n’ abahatuye. Ngo icyo gihe nibwo bahise bahita Muyurupfu kuko abasore bajyagayo bakanywa urumogi na kanyanga bikabazezengeza.


INKURU ZA :
Tanga Igitekerezo
Ibitekerezo 4
Riberakurora Kuya 29-11-2019

Aha hantu umutekano muke cyane waho umaze igihe, abaturage barahagorewe , gusa ntanganzwa nabayobozi baba bavuga ngo ikibazo turakizi tugiye kugikurikirana kdi bakabivuga ari uko itangaza makuru ryahageze cg hapfiriye umuntu cg se iyo Umukuru wigihugu ahageze, iyi mvugo kuri njjye irarambiranye pe!! Abayobozi nibakore akazi bashinzwe nicyo abaturage baba babagiriye ikizere bakabatora.

Mugwaneza Kuya 23-11-2019

Nonese umunyamakuru ko aba yazanywe n’ibibazo bihangayikishije abaturage yaje kureba iyo hotel ahubwo vuga niba nta mutekano muke ukiharangwa? Na meya ntiyabihakanye none wowe ngo hubatswe hotel none wayitembereyemo bukira wataha ute?

kureberera Kuya 21-11-2019

ibi bintu biba biteye isoni ariko; ngo Meya yari abizi. ariko bagiye bahita begurana na njyanama yose koko.
ko mwari mubizi se kuki byabaye ngombwa ko bijya mu binyamakuru?

Kagabo Eduard Kuya 20-11-2019

Ahahantu higeze kugira ayo mateka ariko ariko , Police ningabo byacu bihahora umunsi kumunsi sinzi impamvu uyumunyamakuru atavuze ko hubatswe na Motel bita summer land.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...