konka coffee
KONKA

AMAKURU

UKWEZI

Abagore n’urubyiruko rw’u Rwanda bagiye gufashwa kunoza umurimo uzabakura mu bukene

Abagore n’urubyiruko rw’u Rwanda bagiye gufashwa kunoza umurimo uzabakura mu bukene
28-05-2018 saa 18:06' | By Chief Editor | Yasomwe n'abantu 5938 | Ibitekerezo

Muri Gashyantare uyu mwaka, Leta y’u Rwanda ibinyujije muri Minisiteri y’abakozi ba Leta n’umurimo, Urugaga rw’Abikorera mu Rwanda n’ishyirahamwe ry’amasendika mu Rwanda, babifashijwemo n’Umuryango mpuzamahanga wita ku murimo (ILO: International Labour Organization), basinye inyandiko zitangiza Gahunda y’Igihugu y’umurimo unoze; igamije gufasha cyane urubyiruko n’abagore kubona imirimo ibanogeye, ndetse ikabakura mu bukene. Kugeza ubu, iyi gahunda ikaba yaratangiye ndetse itanga icyizere cyo kuzarushaho gukura by’umwihariko abagore n’urubyiruko mu bukene.

Iyi gahunda ubusanzwe igamije kunoza ibijyanye n’umurimo ariko yibanda cyane ku bakozi bakora imirimo itanditse nk’ubufundi n’ubuyedi, abikorera imizigo n’indi mirimo iciriritse, ari nabo ngo usanga badahabwa ibyo amategeko ateganya bijyanye n’uburenganzira bw’umukozi, ndetse ngo n’abakoresha ugasanga badasobanukiwe ibyo babagomba.

Ubwo Umuryango mpuzamahanga wita ku murimo (ILO) wamurikaga ibijyanye n’aho iyi gahunda igeze, umuhuzabikorwa wawo akaba anawuhagarariye mu Rwanda, Muzale Jude, yavuze ko abarimo kwibandwaho muri iyi gahunda ari abantu bafite umwanya ukomeye mu iterambere ry’ubukungu bw’igihugu.

Muzale Jude ati: "Imirimo itanditse ifite uruhare rungana na 90% ku isoko ry’umurimo kandi abenshi mu bayikora biganjemo urubyiruko n’abagore, ninayo mpamvu iki gice cy’Abanyarwanda kibandwaho by’umwihariko mu gushyira mu bikorwa uyu mushinga”.

Umuhuzabikorwa wa ILO akaba anawuhagarariye mu Rwanda, Muzale Jude

Iyi gahunda izamara imyaka 3 ndetse ikaba yaratewe inkunga na Ambasade ya Suwede mu Rwanda, ingana na miliyoni eshatu n’ibihumbi magana abiri by’amadolari, ni ukuvuga hafi miliyari ebyiri na miliyoni magana inani z’amafaranga y’u Rwanda (2,781,632,000). Muzale Jude avuga ko ku ikubitiro muri iyi gahunda bagiye guhera ku bantu 600 mu buryo bw’igeragezwa mu mujyi wa Kigali, hakazakomerezwa ku bagore n’urubyiruko bo mu zindi ntara z’igihugu.

Iyi gahunda kandi izanagira uruhare mu gufasha abakora imirimo iciciritse mu bijyanye no guhanga imirimo mishya kimwe no kuyikora mu buryo butanga inyungu n’umusaruro ufatika, bigafasha abakozi kugira imibereho irushijeho kuba myiza.

Ibarura riheruka muri Gashyantare 2017 ryerekana uko umurimo uhagaze mu Rwanda, ryerekanye ko ubushomeri muri rusange mu Rwanda buhagaze ku kigero cya 16.7 %, mu rubyiruko ubushomeri buri ku mpuzandengo ya 21% mu gihe mu bagore ari 17.5%.

Gahunda y’Igihugu y’umurimo unoze, izatuma urubyiruko n’abagore babona umurimo utanga umusaruro. Iyi gahunda ishingiye ku mahame ane ariyo:

  • Guteza imbere umurimo unoze mu rubyiruko n’abagore;
  • Ubwishingizi kuri buri mukozi;
  • Guteza imbere ibiganiro hagati ya Leta, Umukozi n’Umukoresha no
  • Guteza imbere uburenganzira bw’abakozi mu kazi.

INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...