AMAKURU

UKWEZI

Rusizi: Ibidasanzwe mu bukwe bw’umukobwa wabengewe ku rusengero agataha aririra mu gatimba

Rusizi: Ibidasanzwe mu bukwe bw’umukobwa wabengewe ku rusengero agataha aririra mu gatimba
30-07-2018 saa 17:06' | By Vincent Nsengiyumva | Yasomwe n'abantu 16162 | Ibitekerezo 11

Mu mpera z’icyumweru gishize ku mbuga nkoranyambaga hakwirakwijwe amafoto n’amashusho by’umukobwa wabengewe ku rusengero n’umugabo we bari bagiye gushyingiranwa. Ibirori by’aba bombi byabaye nka ya ‘mata arimo gishegesha’ ntibyataha, kubera ibisa n’ikinamico n’ amacenga byaranze aba bombi mbere y’igihe bari baragennye cyo kurushinga.

Uyu mukobwa witwa Nyandwi Therese n’umusore Niyomugabo Thacien bari basanzwe basengera mu itorero rya ADEPR ku Mudugudu wa Rugaragara muri Paruwasi ya Muramba mu murenge wa Nkanka ho mu Karere ka Rusizi.

Ku wa Gatandatu tariki 28 Nyakanga nibwo uyu musore n’iyi nkumi bari gukora umuhango wo gusaba no gukwa ndetse nu gusezerana imbere y’Imana, bagakora ibirori bamwe bavuga ko aribyo biza ku isonga mu gutanga ibyishimo bisendereye mu buzima bwa muntu ndetse bikanaba urwibutso rw’abashakanye nk’ikimenyetso cy’urukundo bagiranye.

Umuhango wo gusezerana imbere y’amategeko Nyandwi Therese na Niyomugabo Thacien bari barawusoje mbere, cyane ko bari bagiye kumara umwaka basezeranye ko umwe ari umugabo w’undi ndetse n’undi akaba umugore w’undi.

Uyu munsi w’ibyishimo n’amateka waje kubera aba bombi cyane cyane Nyandwi Therese uw’agahinda, umubabaro n’amarira kuko atigeze agira amahirwe yo guhabwa impundu ndetse n’impano z’ababyeyi, dore ko ubukwe bwacyuye igice nyuma y’uko bageze ku rusengero uwari kumubera umugabo akamubenga ndetse agahita ahamusiga akigendera.

Ubwo byagendaga gutya, abaherekeje umukobwa barumiwe, bafata umugeni wabo bamusubirana mu rugo iwabo, ari nako yagendaga arira kubera intimba yari atewe n’ibyari bimubayeho mu maso ya rubanda.

Ubukwe bw’aba bombi bwagaragayemo udushya twinshi abantu barumirwa

Ubukwe bwa Nyandwi Therese na Niyomugabo Thacien bwabanjirijwe n’umuhango wo gusaba no gukwa, ariko bamwe mu babutashye babwiye ikinyamakuru Ukwezi.com ko uyu muhango waranzwe n’udushya dutandukanye aho byagaragaraga nk’aho butunguranye ku mpande zombi.

Uwamahoro Clementine wakurikiranye uko ubu bukwe bwagenze yavuze ko ibyabereye muri ubu bukwe byasaga n’ikinamico, kuko ngo nta na kimwe cyagaragazaga ko babwiteguye.

Yavuze ko umusore yagiye gusabirwa yambaye imyenda isanzwe, ndetse ngo bageze iwabo w’umukobwa ho biba agahomamunwa kuko we yasohotse yambaye ibitenge [ amaribaya] ndetse atanambaye inkweto.

Yagize ati “ Byari ibirori bitangaje ku babashije kubireba n’amaso yabo. Umusore yagiye gusaba yambaye ipantaro y’umutuku ya koto (Coton) n’agakote gasanzwe, ari kumwe n’abantu bake bari bamuherekeje. Bageze iwabo w’umukobwa basanga nta na kimwe giteguye bisa n’aho batari bazi ko baza gusabwa umugeni.”

Yakomeje agira ati “ Bageze iwabo w’umukobwa, basohoye fanta nk’eshatu, iy’umusaza uvuga ijambo n’iy’umukwe, ariko umukwe nta n’iyo yanyoye. Imihango yo gusaba yaratangiye maze bahamagaye umukobwa asohoka mu nzu yambaye ibitenge [amaribaya] ndetse nta n’inkweto yambaye.”

JPEG - 53.8 kb

Niyomugabo Thacien[wambaye ikote n’ipantaro y’umutuku] n’umugeni we bari ku rusengero

Amacenga n’akagambane hagati y’aba bombi ubwo biteguraga kurushinga

Umunyamabanga Nshingwabikorwa w’akagali ka Kinyaga uyu musore n’inkumi bavukamo, Ndagijimana Japhet, yatangarije Ukwezi.com ko mbere y’ubukwe bwa Nyandwi Therese na Niyomugabo Thacien habanje kuzamo ikibazo, aho ababyeyi b’umusore batashakaga ko arongora uyu mukobwa, kandi baramaze gusezerana mu rukiko.

Yavuze ko umusore yabwirwaga [kuko yari yaragiye muri Uganda gukorerayo] ko ngo umukobwa asigaye ari indaya ko ndetse yanishyingiye ku wundi mugabo i Kigali.

Akomeza avuga ko umusore yaje kuza maze ajyana ikirego asaba ko yasubizwa inkwano y’amafaranga ibihumbi Magana abiri na mirongo itanu (250.000 frw) yari yakoye ndetse n’indishyi y’akababaro, avuga ko umukobwa yamubenze akishakira undi mugabo.

Yagize ati “Umusore yazanye ikirego ko ngo ashaka ko asubizwa inkwano ye, maze numvise ibibazo bafitanye numva ari amatiku mbashyira ku ruhande mbagira inama umusore yanga kumva maze mbabwira ko nta bubasha mfite bwo gusesa isezerano, mbagira inama ko bakiyunga bagakomeza gahunda yabo bakajya gusezerana imbere y’Imana nk’uko bari babiteguye.”

Avuga ko bavuye ku kagari bafashe umwanzuro ko ubukwe bukomeje nta gisibya, gusa ngo akurikije uko yabonaga gahunda z’abo mu muryango w’umusore, ngo intego bari bafite yari ukuzasebya no gutesha agaciro umukobwa.

Ati “Umuryango w’umusore bapanze ko aho guhara inkwano bemera bagapanga ubukwe, maze bava ku kagari bemeranyije ko ubukwe bugiye gukomeza nta gisibya. Icyari gihari byari ukugira ngo barebe uburyo bakora iteshagaciro ku mukobwa bamusebye, kuko bavugaga ko yababengeye umusore n’ubwo umukobwa yababazaga uko yaba yaramubenze kandi arimo kwemera ko bakora ubukwe.”

Gitifu nawe yemeza ko uko ubukwe bwo gusaba bwakozwe byagaragazaga ko bisa n’ibituguranye ku mpande zombi, ngo kuko nta cyagaragazaga ko hari imyiteguro yabayeho.

Niyomugabo Thacien uvugwaho kubenga umukobwa abihakana yivuye inyuma akavuga ko we atigeze yifuza ko ubukwe bwe bupfa ndetse ngo iwabo w’umukobwa bamumenyesheje ko ubukwe butazaba we yaranarangije kwitegura no gutanga ubutumire mu nshuti n’abavandimwe.

Niyomugabo Thacien anahamya ko umukobwa yari yarishyingiye ku wundi mugabo, akaba atemeranya n’abavuga ko umukobwa yari yaragiye i Kigali kwakira intwererano mu nshuti n’imiryango.

Yagize ati “Twageze ku Kagari batumira umukobwa ava ku mugabo (babanaga) ageze mu rubanza yisubiraho avuga ko ankunda. Gusa nahise mbona ko ari uburyo bwo gushaka kundiganya inkwano zanjye nanjye ndamubwira nti nta kibazo noneho uzaze dusezerane kuko nari mbonye ko bafite amayeri yo kugirango inkwano zanjye nzazibure.”

Bagiye gushyingirwa batarigeze berekanwa ku rusengero nta n’inyigisho z’umubano bize

N’ubwo aba bombi bari biteguye kujya gushyingirwa ndetse bakanerekeza ku rusengero, amakuru agera ku kinyamakuru Ukwezi.com ashimangira ko batari bigeze berekanwa mu rusengero, ndetse ngo ntibanahawe inyigisho itorero riha abagiye gushyingirwa, bivuze ko ibibanziriza gusezerana mu rusengero byose nta na kimwe bakoze.

Umugeni yaratutswe, arakubitwa anatanyagurizwaho ikanzu y’ubukwe

Gitifu w’akagari ka Kinyaga, Ndagijimana Japhet, yanavuze ko abo mu muryango w’umusore bagambaniye umukobwa mu rwego rwo kumusebya no kumutesha agaciro, aho yahohotewe bikomeye ndetse akashwanyagurizwaho ibyo yari yambaye ku munsi w’ubukwe.

Yagize ati “Ubwo umugeni yasubiraga iwabo nyuma y’uko umugabo yari amaze kumubengera ku rusengero, yashungerewe n’imbaga y’abantu barimo insoresore bivugwa ko zari zaguriwe n’umuryango w’umusore ngo zimusebye. Iyi mbaga yarimo izi nsoresore bagendaga bamutuka banamukubita ku buryo banamuciriyeho ikanzu.”

Yakomeje avuga ko ubwo ab’iwabo babonaga akomerewe, ngo bamutegeye moto kugirango bamere nk’abamucikishije, maze izo nsoresore zibakubitira hamwe n’uwo mumotari wari ugiye kumutwara.

Gitifu yavuze ko bamwe mu bamukubise bamenyekanye ndetse ko bari gukurikiranwa n’inzego zishinzwe umutekano.

Twagerageje kuvugisha Nyandwi Therese ku murongo wa telefoni ngendanwa ariko ntibyadukundira kuko inshuro zose twayihamagaraga twasangaga ifunze.

Umugeni ari gusohoka iwabo agiye kwerekeza ku rusengero

JPEG - 63.5 kb

Umugeni yasubiye iwabo ashungerewe n’imbaga y’abantu


INKURU ZA :
Tanga Igitekerezo
Ibitekerezo 11
gaga Kuya 30-08-2018

Eeee ni hatari pe inyamanswa mbi n umuntu nubundi yaribuzamunigire mugitanda ariko kandi burya lmana niyo itanga

gaga Kuya 30-08-2018

Eeee ni hatari pe inyamanswa mbi n umuntu nubundi yaribuzamunigire mugitanda ariko kandi burya lmana niyo itanga

gisuperi Kuya 29-08-2018

Gusa birababaje ariko ubutabera bizakora akazi kabwo barebe icyateye umusore gukora biriya gusa nagahomamunwa murakoze

Nina Kuya 15-08-2018

Uwo mukobwa ntababare kuko uwo si umuryango wo gushakamo, n’uwo mugabo w’umbwa unafatirwa ibyemezo na famille. Ubu ntiyabyumva, ariko yari kuzababara kurushaho nyuma afite nabo bana, ariko ubu azishakira undi ubuzima bukomeze.

gerard Kuya 13-08-2018

uwo musore yakoze amakosa aba yaramubwiye ko atamushaka mbere yihe birababaje

anastase habimana Kuya 13-08-2018

ngisi bb bwira yanyuma .abantu buzuwe guhemukagusa .hari nabazakora ibenzibyo .nimusengecyane. yahemukie umwarirwose

-xxxx- Kuya 1-08-2018

Arko c kko ubwo mushyizw mubwenge murumva uyu musore atari inama imiryango yamugiriye yogusebya umukobwa.nibyo byokumuca inyuma namayeri gusa.cyakora Imana izabimubaza kdi aracyari ku isi nawe azabona

-xxxx- Kuya 1-08-2018

Arko c kko ubwo mushyizw mubwenge murumva uyu musore atari inama imiryango yamugiriye yogusebya umukobwa.nibyo byokumuca inyuma namayeri gusa.cyakora Imana izabimubaza kdi aracyari ku isi nawe azabona

mugigi Kuya 1-08-2018

niba koko ibyavuzwe kuri uriya mukobwa aribyo rwose biriya yakorewe ni sawa ariko Uzi kwirya ukimara ukwa umukobwa watayeho igihe umukunda ukamuha ikizere umujyana murukiko wajya gupagasa kidogo ushaka ayikanzu ngo uzamwambike nkikigori ati uwange naramubonye reka mbe ntanga ubunani byararangiye ni agahomamunwa jye sinzi icyo namukorera

kanyoni Kuya 30-07-2018

Mbega umusore w’umugome! niba utarashakaga umukobwa kubimubwira mbere byari bihagije utarinze kumusebya kuriya. Niba uyu musore yararyamye agasinzira yaba atari umuntu pe! icyo wifuza ko kitakubaho nawe ntukagikorere mugenzi wawe. Imana ikomeze umukobwa

Tatien Kuya 30-07-2018

About Bantu bakubise uwo mugeni bakwiye guhanwa rwose kko uko biri kose uyu mukobwa nuko atemerwaga nabo Kwa sebukwe.Nibakurikiranwe kko harimo akarengane ndetse nuwo musore wamubenze nawe akurikiranwe kko afitebamakuru arambuye kubyakorewe uwo mukobwa.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...