Umuyozi w’Ishami ry’Umuryango w’Abibumbye ryita ku Buzima (OMS), Dr Tedros Adhanom Ghebreyesus yasabye ubuyobozi bwa Tanzania kujya bugaragaza imibare y’abandura COVID-19 kugira ngo guhashya iki cyorezo muri kiriya gihugu bihabwe umurongo.

Kugaragaza iyo mibare ngo byatuma abaturage b’icyo gihugu bashyirwa muri gahunda yo gukingirwa icyo cyorezo, nk’uko bitangazwa n’Umuyobozi mukuru wa OMS, Dr Tedros Adhanom Ghebreyesus, uvuga ko yaganiriye n’abayobozi b’icyo gihugu ku buryo cyakumira icyo cyorezo ariko bakaba bataragaragaza ubushake bwo kugira icyo bakora.

Agira ati “Ndasaba igihugu cya Tanzania gushyira mu bikorwa gahunda zo kubungabunga amagara y’abantu hirindwa Covid-19 n’ikwirakwira ryacyo, kandi Leta ikitegura no kwakira inkingo z’icyo cyorezo”.

Tedros yongeraho ko hari abanya Tanzania baherutse gutemberera mu bihugu bituranyi ndetse n’ahandi ku isi, bapimwe babasangamo Covid-19 nk’uko bitangazwa na BBC, ibyo ngo bikaba biteye impungenge ari yo mpamvu asaba icyo gihugu guhafata ingamba zikomeye zo kurinda abaturage bacyo.

Perezida wa Tanzania, John Pombe Magufuli, aherutse gusaba abakuriye amadini n’abaturage muri rusange, gusenga cyane kugira ngo Imana irinde igihugu cyabo icyorezo cya Covid-19, cyane ko na mbere hose yagaragaye mu mbwirwaruhame zinyuranye avuga ko amasengesho ariyo azarinda igihugu cye iyo ndwara.

Ubuyobozi bw’iki gihugu kandi buherutse gutangaza ko butazigera bwakira inkingo za COVID-19 ahubwo ko abaturage bakwiye kwikingira bakoresheje imiti gakondo.

UKWEZI.RW