konka coffee
KONKA

AMAKURU

UKWEZI

Ibintu 5 bitangaje waba utazi kuri Emmerson Mnangagwa ugiye gusimbura Robert Mugabe

Ibintu 5 bitangaje waba utazi kuri Emmerson Mnangagwa ugiye gusimbura Robert Mugabe
23-11-2017 saa 11:04' | By Chief Editor | Yasomwe n'abantu 21112 | Ibitekerezo 2

Emmerson Mnangagwa w’imyaka 75 y’amavuko, niwe uzarahirira kuyobora Zimbabwe by’agateganyo kuri uyu wa Gatanu tariki 24 Ugushyingo 2017,nyuma yo kwegura kwa Robert Mugabe wari umaze imyaka myinshi ayobora iki gihugu. Ni isomo kuri benshi mu buzima busanzwe ko ushobora kurucira mukaso rugatwara nyoko nk’uko umugani mu Kinyarwanda ubivuga, dore ko uyu yari aherutse kwirukanwa na Robert Mugabe agahungira muri Afurika y’Epfo none bikaba birangiye amusimbuye. Ese uyu mukambwe we ni muntu ki? Muri iyi nkuru turagaruka ku bintu bitangaje ushobora kuba utamuziho.

Emmerson Dambudzo Mnangagwa yavutse tariki 15 Nzeri 1942, avukira muri Zimbabwe ariko yitwaga icyo gihe Southern Rhodesia. Mu bwana bwe yari umuhanga cyane, kuburyo yagiye mu cyiciro cya kabiri cy’amashuri yisumbuye asimbutse amwe mu masomo y’imyaka ibiri, kuko yahawe ikizamini agatsinda kurusha abandi bari barakirangije. Ababyeyi be bari abahinzi ariko baje guharanira ubwisanzure bwabo ku masambu bashakaga gukura mu maboko y’abazungu b’Abongereza, maze biza gutuma Emmerson Dambudzo Mnangagwa ahungira muri Zambia n’umuryango we batinya kwicwa.

JPEG - 185.2 kb

Yagiye akora imirimo myinshi muri Zimbabwe, yanyuze muri byinshi kandi yakoze byinshi bituma ari ikimenyabose muri Zimbabwe ariko muri iyi nkuru turagaruka ku bintu 5 gusa by’ingenzi umuntu akwiye kumenya kuri uyu mukambwe ugiye kuba Perezida wa kabiri mu mateka ya Zimbabwe, igihugu kitari cyaramenye undi muyobozi utari Robert Mugabe kuva cyabona ubwigenge mu 1980.

1. Emmerson Mnangagwa yakatiwe igihano cy’urupfu

JPEG - 55.6 kb

Mnangagwa wavukiye muri Zimbabwe ariko akaza guhungira muri Zambia n’umuryango we ubwo yari akiri umwana muto, yaje kugaruka mu gihugu cye mu 1960 ahita yifatanya n’umutwe warwanaga intambara yo kwibohora. Icyo gihe yari umunyamategeko. Mu 1965 yaje gukatirwa igihano cy’urupfu azira gutega igisasu gari ya moshi mu gace kitwa Masvingo, ariko icyo gihano cyaje guhindukamo icy’igifungo kuko yari akiri muto, amategeko atemera ko yahanishwa kumanikwa ku myaka ye.

Ageze muri gereza, niho yahuriye na Robert Mugabe ndetse ahita anifatanya nawe mu ishyaka yari yarashinze ryari rigamije guharanira ubwigenge bwa Zimbabwe, iryo rikaba ari ZANU - PF ikinayoboye igihugu kugeza magingo aya.

2. Emmerson Mnangagwa yagize uruhare mu bikorwa by’ubwicanyi, abatizwa INGONA

JPEG - 756.6 kb

Mnangagwa yari Minisitiri w’Umutekano muri Zimbabwe hagati y’umwaka w’1983 no mu 1984, ubwo abaturage babarirwa mu 20.000 bicwaga mu gace kitwa Ndebele, bazira kuba mu ishyaka ritavugaga rumwe n’ubutegetsi ryitwaga ZAPU (Zimbabwe African People’s Union). Mu 1983, Mnangagwa yari yaravugiye ahitwa Lupane ko abarwanashyaka ba ZAPU ari ibinyamunjongorerwa bikwiye kwicwa bigashira, gusa nyuma y’ubwicanyi yahise abyihunza aho yavuze ko n’ubwo yari Minisitiri w’Umutekano, ubwo bwicanyi bwabazwa igisirikare.

Kutagira impuhwe n’amashagaga ya Mnangagwa, byatumye ahabwa akabyiniriro k’INGONA, bashaka kugaragaza ko ari umugome. Abantu bari bamushyigikiye muri iki gihugu baje kubahimba itsinda ry’aba Lacoste (Team Lacoste), bitewe n’ikirango kiriho ishusho y’ingona cyamamaye ku myenda n’imikandara.

3. N’ubwo Mugabe yamwirukanye nawe akaba amusimbuye, hari ubwo yigeze kwitwa umwana we

JPEG - 75.6 kb

Umubano wa Mnangagwa na Robert Mugabe ni uwo mu myaka yashize kandi bagiranye ubucuti n’ubufatanye budasanzwe n’ubwo ibyabo byaje kurangira nabi. Mnangagwa yafashije cyane Mugabe mu rugamba rwo guhangana n’Abongereza bayobora Zimbabwe nk’abakoloni, maze Mugabe amaze kuba Perezida ahita amugira Minisitiri w’umutekano. Mnangagwa yaje no kuba umujyanama wihariye wa Perezida Mugabe mu bijyanye n’ubutasi n’iperereza, aba umuntu we wa hafi kuburyo benshi mu gihugu baje no kumufata nk’umuhungu wa Perezida Robert Mugabe.

Yabonye imirimo itandukanye mu butegetsi bwa Mugabe kugeza muri 2004 ubwo yagaragazaga ko yifuza kuba Visi Perezida wa mbere kandi uyu mwanya umugore wa Mugabe yarawushakaga kuva cyera, bituma ahita yigizwa ku ruhande. Robert Mugabe ariko yaje kongera kumwitabaza mu matora ya 2008 aho yamugize ukuriye ibikorwa bye byo kwiyamamaza, birangiye ahita amusubiza mu myanya y’ubuyobozi aho yagiye ashinjwa guhitana benshi mu batavuga rumwe n’ubutegetsi bwa Mugabe.

4. Mnangagwa ni inkoramutima y’igisirikare cya Zimbabwe n’icy’u Bushinwa, ninabo bamurwaniye ishyaka yirukanywe

JPEG - 40.7 kb

Emmerson Mnangagwa ni inshuti ikomeye y’igisirikare cya Zimbabwe ariko yabaye inkoramutima kurushaho kuva muri 2009 kugeza muri 2013 ubwo yari Minisitiri w’Ingabo muri Zimbabwe. Inshuti ye magara mu gisirikare ni General Constantino Chiwenga, umugaba mukuru w’Ingabo za Zimbabwe, uyu akaba ari nawe wagize uruhare mu gikorwa cyakuye Mugabe ku butegetsi kikanagena ko Mnangagwa yahita amusimbura.

Emmerson Mnangagwa ni inshuti ikomeye cyane kandi y’igisirikare cy’u Bushinwa. Habura icyumweru kimwe ngo igisirikare cya Zimbabwe gikore igikorwa cyahiritse Robert Mugabe ku butegetsi, General Constantino Chiwenga yahuye na General Li Zuocheng uyobora ingabo z’u Bushinwa, bamugira inama y’uko bazakora iki gikorwa cyane ko na Emmerson Mnangagwa yigeze guhabwa imyitozo y’intambara mu Bushinwa kandi akaba yarakomeje kuba inshuti yabo.

5. Abaye Perezida nyuma y’imyanya ibiri ikomeye mu buyobozi bw’igihugu cya Zimbabwe yahemberwaga icyarimwe

JPEG - 23.2 kb

Abatavuga rumwe n’ubutegesi bwa Robert Mugabe, bagiye bamunenga cyane kuba yaragiye aha ubutegetsi abantu be hafi kugeza ubwo Minisitiri yahindutse Visi Perezida, imyanya yombi agayigumana kandi akajya ayihemberwa. Kuva muri 2013, Emmerson Mnangagwa yari Minisitiri w’Ubutabera n’ibikorwa by’Inteko Ishinga amategeko, ariko muri 2014, Perezida Mugabe yamugize Visi Perezida wa mbere, iyo myanya yombi arayigumana kandi akajya ayihemberwa icyarimwe.


INKURU ZA :
Tanga Igitekerezo
Ibitekerezo 2
Bienvenu Nduwayezu Kuya 23-11-2017

Komeza Amakuru Turabemera Cane

Emmanuel Kuya 23-11-2017

Gira uti ahubwo abaye nka ya nkware y’inyabugingo itora mu itongo ry’uwayihigaga.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...