Nyuma y’uko hakwirakwijwe amashusho agaragaza umugabo ari gupfunyikira abantu insenene mu ndege ya Kompanyi ya Uganda (Uganda Airlines) ndetse n’uwafashe aya mashusho, batawe muri yombi bakurikiranyweho ibyaha bitatu birimo guhungabanya ituze.

Uwagurishaga insenene mu ndege, afite imyaka 27 mu gihe uwafashe amashusho we afite 25 bakaba barabikoreye ku kibuga cy’indege mpuzamahanga cya Entebbe, bombi bakaba batawe muri yombi na Polisi ya Uganda.

Amashusho y’uwo mugabo arimo apfunyikira buri wese ubishaka insenene mu ishashi ubwo indege ya Uganda Airlines yari igiye guhaguruka yararebwe cyane ku mbuga nkoranyambaga.
Abanya-Uganda benshi banenze iki gikorwa cyo gucururiza mu ndege, bituma bamwe bakemanga umutekano muri izi ndege.

Itangazo rya Uganda Airlines ryo kuwa gatandatu rivuga ko ibi "twabikuyemo isomo".

Iyi kompanyi ivuga ko nibiba ngombwa izongera utu dusimba ku mafunguro itanga mu ndege kuko "bamwe mu bakiriya bacu bakunda insenene."

Umuvugizi wa polisi, Fred Enanga yavuze ko bariya bagabo baregwa ; guhungabanya ituze, kwanga gukurikiza amabwiriza y’abashinzwe indege, n’ibikorwa bishobora gutera ikwirakwira ry’indwara yandura.

Ibyo byaha bishobora gutuma aba baregwa bafungwa imyaka irindwi nk’uko amategeko muri iki gihugu abiteganya.

Monitor isubira amagambo y’umuvugizi wa Polisi avuga ko bombi "banze kumvira umukozi w’indege wabegereye akabasaba kureka ibyo bikorwa bitemewe no kwicara."

Yavuze kandi ko abaregwa bashyize ubuzima bw’abagenzi mu kaga banga kwambara udupfukamunwa kandi ari itegeko rya minisiteri y’ubuzima ahahurira abantu benshi.

Hari amakuru avuga ko hari abakozi b’indege bahagaritswe kubera ubu bucuruzi bw’insenene mu ndege ya kompanyi ya leta.