konka coffee
KONKA

AMAKURU

UKWEZI

Nairobi yateye ikirenge mu cya Kigali nayo ishyiraho gahunda ya ‘Car-free day’

Nairobi yateye ikirenge mu cya Kigali nayo ishyiraho gahunda ya ‘Car-free day’
10-07-2018 saa 14:25' | By Muhire Aime Placide | Yasomwe n'abantu 2431 | Ibitekerezo

Umurwa mukuru w’igihugu cya Kenya,Nairobi wateye ikirenge mu cy’umujyi wa Kigali, aho nawo washyizeho gahunda ya ‘Car free day’ mu rwego rwo kugabanya akavuyo n’umuvundo w’ibinyabiziga bigaragara muri uyu mujyi.

Ubusanzwe Nairobi ni umugi wa kabiri mu migi ibonekamo akavuyo k’amamodoka menshi ku isi. Mu rwego rwo kugabanya ako kavuyo, igihugu cya Kenya kirateganya ko ku munsi wa Gatatu n’uwa Gatandatu w’icyumweru nta modoka zizaba zemerewe gucaracara mu mijyi ibiri ibonekamo ibinyabiziga byinshi n’urujya n’uruza rw’abantu kuruta iyindi.

Ikigambiriwe muri iki gihugu ni ukorohereza abakorera ingendo muri za bisi na gariyamoshi kugira ngo zihute kurusha uko zagendaga kuko imodoka z’abantu bwite zitazaba zemerewe kunyura mu mihanda kuri iriya minsi yavuzwe haruguru.

N’ubwo hatatangajwe umunsi iyi gahunda izatangira kubahirizwaho, imihanda yerekeza mu mujyi yatangiye kuvugururwa nk’ikimenyetso kigaragaza ishyigikirwa ry’iyi gahunda. Iki gikorwa cyo kuvugurura imihanda kizamara amezi atandatu nk’uko bitangazwa na Leta ya Kenya.

Ubushakashatsi bwakozwe bwagaragaje ko imijyi ibiri izahitoranywa izafashwa cyane n’iyi gahunda yo gukumira imodoka mu buryo butari bumwe. Abaturage 40.6% batuye mu mijyi ya Kenya nta bushobozi bafite bwo kwigurira imodoka zabo bwite, mu gihe abangana na 39.7% bo batabasha kwiyishyurira bisi bakaba birirwa bazenguruka imijyi n’amaguru.

Kuva mu mwaka wa 2016, muri Kigali hatangiye gushyirwa mu bikorwa gahunda ya car-free days; ku munsi wabugenewe abantu ingeri zose bahuzwa no gukora imyitozo ngororangingo. Ibikorwa by’ubuvuzi birimo gupimwa umuvuduko w’amaraso n’ izindi ndwara zipimwa ku buntu muri icyo gikorwa kiba kinitabirwa n’abayobozi b’inzego zitandukanye.

Ubuyobozi bw’umujyi wa Nairobi nabwo bugiye gutangiza iyi gahunda izabanzirizwa no kuganiriza abenegihugu kugira ngo babyumve kimwe.

Ubuyobozi bw’umujyi wa Nairobi bwatangaje ko ikigamijwe muri iyi gahunda ikiri gutegurwa ari uguteza immere imibereho myiza y’abatuye imijyi, kubahuriza hamwe hagamijwe gusigasira ubumwe binyuze mu kumenyana ndetse no gukumira iyanduzwa ry’ikirere riterwa n’ibyotsi birekurwa n’ibinyabiziga.

Ku isi yose, buri mwaka abaturage basaga miliyoni 4 bapfa imfu zituruka ku ihumana ry’ikirere.

Leta ya Kenya iteganya ko imyuka yoherezwa n’ibinyabiziga mu kirere izagabanuka ku kigero kiri hagati ya 20 na 78% mu gihe gahunda ya car-free days izaba yatangiye kubahirizwa.

Kugabanuka k’urusaku mu mijyi ni indi nyungu izava mu kubahirizwa kw’iyi gahunda. Urusaku rukabije mu mihanda y’imijyi ya Kenya ruri kurenga imipaka kandi ibibazo byose bituruka ku rusaku biterwa n’ingendo z’ibinyabiziga.

Kugera ubu,Abanyakenya basaga 640,000 barwaye indwara zituma batumva neza; umubare nyamwinshi w’abana batoya bakomeje kurwara imitima ndetse bagahura n’ibibazo mu mikorere y’ubwonko bwabo biturutse ku rusaku rw’ibinyabiziga.

Kubuza imodoka gutambuka mu mijyi ya Kenya mu gihe cy’iminsi ibiri mu kwezi ni imwe mu ngamba zitezweho kugabanya impanuka zo mu mihanda. Ikigereranyo cyakozwe cyagaragaje ko abantu 7 bapfira mu mpanuka z’ibinyabiziga zibera mu mihanda 35 buri munsi. N’ubwo bigoye guteganya ko imfu zituruka ku mpanuka zizagabanuka, umutekano wo mu muhanda ni umusaruro witezwe ku gikorwa cya car-free day.

Nk’uko bitangazwa na Africa Business Communities, umutekano wo mu muhanda uzagerwaho binyuze muri car-free day uzatuma abanyamagare barushaho kuba benshi mu mijyi, igikorwa kishimiwe cyane ko gutwara igare bigira ingaruka nziza ku buzima kurusha gutwara imodoka. Abashinzwe iki gikorwa bitezweho guhindura imihanda mu buryo bunogeye abanyamaguru n’abanyamagare.

Car-free day yitezweho kuzagabanya umuvudo w’imodoka ukunze kugaragara i Nairobi


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...