konka coffee
KONKA

AMAKURU

UKWEZI
ubumwe

U Rwanda rwiyemeje gucunga ibikorwa bya ‘satellite TV project’ byakozwe n’Ubushinwa

U Rwanda rwiyemeje gucunga ibikorwa bya ‘satellite TV project’ byakozwe n’Ubushinwa
27-05-2019 saa 19:58' | | Yasomwe n'abantu 7605 | Ibitekerezo

Umunyamabanga Uhoraho muri Minisiteri y’Ubutegetsi bw’Igihugu, Ingabire Assumpta na Xing Yuchun, Ushinzwe ibikorwa muri Ambasade y’Ubushinwa baherekanya igitabo gikubiyemo ibikorwa by’umushinga ‘Satellite TV’ u Rwanda rwtewemo inkunga n’Ubushinwa.

Uyu mushinga wari wiswe ‘Access to Satellite TV for 10,000 African Villages’, ujyanye na zimwe mu nkingi 10 ziri mu masezerano y’ubufatanye hagati ya Leta y’Ubushinwa na Africa (China-Africa Cooperation, FOCAC) yemejwe mu 2015 i Johannesburg muri Africa y’Epfo inama yemerejwemo ikaba yaritabiriwe na Perezida Xi Jinping w’Ubushinwa.

Umuyobozi w’Akarere ka Rulindo, KAYIRANGA Emmanuel nk’ahantu hatoranyijwe ngo habere guhererekanya inyandiko zikubiyemo ibyakozwe muri uyu mushinga, yavuze ko iki gikorwa ari ubufatanye hagati ya Leta y’Ubushinwa, ikigo gicuruza ikoranabuhanga rya televiziyo, StarTimes na Leta y’u Rwanda.

Yavuze ko televiziyo 200 n’ibikoresho bijyana na zo byahawe Akarere ka Rulindo binyuze muri uyu mushinga zashyizwe ku bigo by’amashuri no ku mavuriro, kandi yizeza ko bizacungwa neza.

Umuyobozi wa StarTimes, Jess Jing yavuze ko bishimiye kuba uyu mushinga warashyizwe mu bikorwa, ashimira Leta y’u Rwanda n’iy’Ubushinwa zatumye ibikorwa byari biwukubiyemo bikorwa.

Ati “Mu gufata neza ibi bikoresho, twifuza ko bizakomeza gufasha abo byagenewe, iterambere ry’abana ni ikintu k’ingenzi twifuza ko ibi bikoresho bizafasha abato kunguka ubumenyi bagahanga ibishya mu buhinzi, ariko byanafasha abantu kumenya amakuru bitewe n’ibyo bashaka kureba. Turashima buri wese wadufashije.”

Yavuze ko decoderi zahawe abatuye mu cyaro zizabafasha kunguka ubumenyi bwinshi mu bijyanye n’ahari isoko ry’imyaka yabo, ngo bazabasha kwiga ibintu bitandukanye byafasha urubyiruko birimo na Siyansi, ariko ngo zizanafasha abaturage bareba televiziyo bamenye gahunda za Leta.

Xing Yuchun, Ushinzwe ibikorwa muri Ambasade y’Ubushinwa yavuze ko uyu mushingwa wemejwe unatangazwa na Perezida w’Ubushinwa Xi Jinping mu Ukuboza 2015 i Johannesburg mu nama y’Ubufatanye hagati ya Africa n’Ubushinwa.

Yavuze ko umushinga ugamije kugeza amakuru atandukanye ku batuye ibice by’icyaro, u Rwanda rukaba ruri mu bihugu 25 byari byatoranyijwe muri Africa ngo bikorerwemo uyu mushinga.

Yavuze ko bifashishije dekoderi bahawe na StarTimes, abatuye mu midugudu bashobora kureba amasheni 23, bakareba ibiganiro binyuranye by’imyidagaduro n’imikino, ibyigisha n’ibijyanye n’ikoranabuhanga, ubu nibura ngo Abanyarwanda miliyoni 1,5 bashobora kureba televiziyo mu buryo bugezweho bwa ‘digital’.

Ati “Nizera ko bizagirira akamaro Abanyarwanda kandi bikongera amahirwe ku bakiri bato bakamenya ikoranabuhanga.”

Yavuze ko uruzinduko rwa Perezida w’Ubushinwa Xi Jinping mu Rwanda mu kwezi kwa Kamena 2018 ari intambwe ikomeye igaragaza ko umubano w’u Rwanda n’Ubushinwa umaze gufata indi ntera.

Perzida Xi Jinping mu nama yabereye muri Africa y’Epfo muri Nzeri 2018, yiyemeje ko Ubushinwa buzagira uruhare mu guteza imbere inganda kuri uyu mugabane.

Umunyamabanga Uhoraho muri Minisiteri y’Ubutegetsi bw’Igihugu, Ingabire Assumpta yavuze ko umushinga Leta y’u Rwanda iwitezeho amakuru azafasha abaturage kujijuka no gutera imbere, yijeje abahagarariye Ubushinwa ko ibikoresho batanze Leta y’u Rwanda binyuze mu nzego z’ibanze bizacungwa neza.

Kuva muri Mata 2018, ingo 6 000 mu Turere twose tw’u Rwanda zahawe decoderi kugira ngo bajye babasha kureba amasheni atandukanye abaha ibiganiro byabafasha kwiyungura ubumenyi, hanatanzwe televiziyo 900 zishyirwa ahantu hatandukanye hakorera inzego za Leta.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...