AMAKURU

UKWEZI
ubumwe

Hatangijwe gahunda ya ’Study In Rwanda’ izatuma abanyamahanga bifuza kwiga mu Rwanda

Hatangijwe gahunda ya ’Study In Rwanda’ izatuma abanyamahanga bifuza kwiga mu Rwanda
11-06-2019 saa 14:30' | By Chief Editor | Yasomwe n'abantu 14926 | Ibitekerezo 6

Kuri uyu wa Kabiri tariki 11 Kamena 2019, i Kigali muri Serena Hotel habereye ikiganiro n’abanyamakuru cyahuje abafatanyabikorwa batandukanye mu by’uburezi, hatangizwa ibya gahunda ya "Study in Rwanda" igamije kureshya abanyamahanga bakaza kwiga muri Kaminuza zo mu Rwanda, aho kujya kwiga muri Kaminuza zo mu bihugu byateye imbere nk’i Burayi cyangwa muri Amerika.

Gakwandi Claude, abinyujije mu kigo yashinze, amaze igihe kirekire afasha abantu batandukanye haba mu Rwanda no muri Afurika, kubona amashuri meza ya Kaminuza bigamo mu bihugu nka Canada n’ahandi. Mu mpera za 2018, nibwo yaje gutangiza gahunda ya "Study in Rwanda", nyuma yo kubona ko bishoboka ko u Rwanda rwaba igihugu abanyamahanga benshi bifuza kwigamo.

Gakwandi avuga ko yasanze hari bamwe mu bantu bajya bifuza kwiga nko muri Canada ariko bagasanga birahenze cyane, maze aza kubona ko bishoboka kubona uburezi bwiza muri Kaminuza zo mu Rwanda, ari bwo yahise atangira iyi gahunda ya "Study in Rwanda" kandi ngo yatangiye gutanga umusaruro.

Study in Rwanda igamije kureshya abafite Kaminuza zikomeye mu mahanga kuzana amashami yazo mu Rwanda, hakabaho kuzana abarimu b’abahanga baza kwigisha inaha no kuzana porogaramu zimwe na zimwe zigishwa muri Kaminuza zo mu mahanga zikazanwa mu rw’imisozi igihumbi ndetse no gushishikariza abanyamahanga kuza kwiga muri Kaminuza zo mu Rwanda, hakabaho n’ubufatanye bugamije kuzamura ireme ry’uburezi mu Rwanda kandi ngo aho bigeze biratanga icyizere gifatika.

Mu kiganiro n’abanyamakuru, abafatanyabikorwa mu burezi batandukanye bagaragaje ko ireme ry’uburezi mu Rwanda rishobora gutumbagira rikaba ryagera no ku ry’ibihugu bimaze igihe ari ibihangange mu by’uburezi, kandi ngo gahunda ya Study in Rwanda ubwayo ni inzira nziza izazamura ibendera ry’u Rwanda binyuze mu burezi.

Abayobozi bakaba n’abarimu muri Kaminuza zitandukanye zo mu Rwanda, bagaragaje ko abanyamahanga basanzwe bafite byinshi byabakurura kuza kwiga mu Rwanda birimo kuba ari igihugu gitekanye, cyakataje mu by’ikoranabuhanga, gisukuye, gifite abaturage bagirira abanyamahanga urugwiro n’ibindi, bityo ngo ibi nibyiyongeraho abarimu b’abahanga na porogaramu zidasanzwe mu Rwanda, nta kabuza abatari bacye bazishimira kuza kwiga muri Kaminuza zo mu Rwanda.

Iyi gahunda yiswe ‘Study in Rwanda’ iri gukorwa ishyigikiwe n’Ikigo cy’igihugu cy’iterambere(RDB), Ikigo cy’igihugu cy’uburezi( REB) Open University, Carnegie Melon Un, African Leadership University(ALU) U.G.H.E.(University of Global Health Equity), African Institute of Mathematical Studies, Kaminuza y’u Rwanda, Ikigo cy’igihugu cy’imyuga n’Ubumenyi-ngiro (WDA) n’abandi.


INKURU ZA :
Tanga Igitekerezo
Ibitekerezo 6
carine Kuya 15-08-2019

Jye nizr imyuga, nkora tapis call Mr on. 0781587866

Bizi Kuya 11-06-2019

Nibabanguke, reka dushake naho biga

Remy Kuya 11-06-2019

Sha ndumva ari inzozi ariko sinabaca intege. Reka dutegereze tuzarebe niba Kaminuza zikaze twemera ku isi zizemera kuza mu Rwanda. Wenda na bya bizu bya ba Makuza byabuze ababikodesha twazabona bibonye abababamo bikazamura igihugu

Paccy Kuya 11-06-2019

Noneho se ayo makaminuza azakiranuka na HEC ko mbona wagirango guhora ifunga niko kazi bayishinze gusa. Ibibazo by’uburezi bw’u Rwanda byicwa n’abashinzwe kubunoza kuko baba bazi ko abana babo batazigera biga mu Rwanda

Vovo Kuya 11-06-2019

Ariko se ubundi wamugani ko dufite ibisabwa bindi byose, ni ukubera iki tutabona no mu burezi abanyamahanga barata u Rwanda nk’uko barurata mu bindi bitandukanye birimo n’ikoranabuhanga kandi rigira uruhare mu guteza imbere uburezi?

Sam Kuya 11-06-2019

Ndumva bizaba ari byiza ariko igihugu nikibashyigikire ba bategetsi bajyana abana babo kwiga mu mahanga nabo bige mu Rwanda natwe twishimire kwigana n’abifite

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...