konka coffee
KONKA

AMAKURU

UKWEZI
Minijust

Itariki nk’iyi nibwo Kaberuka yivuganye Marita! Menya inkomoko y’iyo nkuru Impala zaririmbye

Itariki nk’iyi nibwo Kaberuka yivuganye Marita! Menya inkomoko y’iyo nkuru Impala zaririmbye
11-02-2019 saa 09:45' | By Chief Editor | Yasomwe n'abantu 15078 | Ibitekerezo 7

Kaberuka na Marita baririmbwa na Orchestre Impala, ni abantu babayeho ndetse bivugwa ko ubu babana nk’umugabo n’umugore aho batuye mu karere ka Rutsiro mu Burengerazuba bw’u Rwanda. Tariki 11 Gashyantare cyangwa Feburuwari nk’uko Impala zibiririmba, niwo munsi ibiririmbwa muri iyi nkuru bivugwa ko byabayeho.

Sebigeri Paul uzwi cyane nka Mimi La Rose ni umuhanzi w’umunyarwanda wamenyekanye cyane muri Orchestre Impala yabayemo kuva yashingwa kugeza n’uyu munsi ari umucuranzi wayo. Mimi La Rose ni umugabo ukuze wavutse mu mwaka w’1954, akaba nta ndirimbo ya Orchestre Impala atazi inkomoko yayo.

Mimi La Rose asobanura ko indirimbo ivugwamo inkuru ya Kaberuka wivuganye Marita, ari inkuru mpamo ivuga uko Kaberuka yaherekeje umusore w’inshuti ye wari ugiye gusura umukunzi we (Fiance) bagerayo uwo mukobwa akikundanira na Kaberuka, kuva ubwo urukundo rwe na Kaberuka rugashinga imizi kugeza babanye nk’umugabo n’umugore.

JPEG - 72 kb

Kaberuka na Marita baririmbwa na Orchestre Impala ni aba bo ku ruhande, bibera i Rutsiro

Mimi La Rose avuga ko umusore wari watwawe umukunzi ari we wababwiye inkuru y’ibyamubayeho akanabasengerera ngo bazabikoremo indirimbo, barayitunganya barayisohora. Gusa ngo n’ubwo Kaberuka uvugwa ari yo mazina ye, Marita ryo ngo ni izina ryahinduwe siryo zina ry’uwo wegukanywe na Kaberuka.

Kaberuka n’uwo mukunzi we ubu baba muri Rutsiro ariko iby’inkuru y’amateka yabo ntibaba bashaka kuyigarukaho no kwemera kuyivugaho mu itangazamakuru.

REBA AMAGAMBO AGIZE IYO NDIRIMBO HANO:

Hari ku italiki ya cumi n’imwe
Z’ukwezi kwa feburuwari
Ni ho nagiye gusura Marita
Nk’uko yari yabinyemereye

Mu guhaguruka sinagiye jyenyine
Naherekejwe n’inshuti yanjye Kaberuka
Nk’uko ntacyo nigeraga muhisha
Ubwo ngo agiye kundambagiriza

Ubwo inzira twayiriraga kuyimara
Ni bwo nagendaga muratira Martha
Twaruhutse tugeze kuri Kano
Ubwo turakomeza turagenda

Twasanze yadutegereje ku irembo
Kuko na we urukumbuzi rwose

Muri uko kuramukanya kw’abadaherukana
Ni ko amasonza yatubungaga mu maso
Muri uko kuramukanya kw’abadaherukana
Ni ko amasonza yatubungaga mu maso

Nyamara ibyo byishimo ntibyatinze
Kuko ibyo nabonaga byambereye urujijo
Inseko nziza si jye yahabwaga
Indoro nziza si jye yarebwaga
Byose byahabwaga Kaberuka nikururiye

Ntibyatinze numva inkuru y’incamugogo
Ko Kaberuka yivuganye Marita
Ubwo nibuka n’ukuntu nakundaga Marita
Ubwo nibuka n’inshuti yanjye inciye inyuma
Maze amarira arisuka

Uwo mwana nagende yaranshavuje (3)

UMVA IYO NDIRIMBO HANO:


INKURU ZA :
Tanga Igitekerezo
Ibitekerezo 7
Jeda Kuya 12-02-2019

Keretse niba izi nkuru zisa,naho Kaberuka yakoraga i kigali muri Ministeri, yambura Tasiani umukunzi we Laurence bise Marita kuko bajyanaga kumusura amumwereka,Kaberuka amusabira akazi nawe i Kigali,Tasiani asigara mu cyaro mu karere aho yakoraga,bose ni abanya Gatsibo, turabazi neza....uwo baramubeshye!!!

KUNDUKURI Kuya 12-02-2019

Muzabaze neza Impala abo baririmbye kuko si abo ngabo. Mimi La Rose avuga ko Marita ari izina ryahinduwe, ibyo bigaragaza ko ifoto idahuye n’inkuru. Si ngombwa ko umuntu yiga amashuri menshi kugira ngo abyumve. Natangajwe no kubona Biraro Atanazi yarigeze kwemera ibivugwa muri iriya nkuru azi neza ko ari ibinyoma byambaye ubusa.

Barabeshya Kuya 12-02-2019

Ibi ni ibinyoma. Biraro n’umugore we Marita bigize aba stars. Muzashake amakuru nyayo . Icyo twasaba ni uko abanyamakuru bazajya baperereza neza mbere yo gusakaza inkuru nk’iyi y’ibinyoma imyaka n’imyaka

Mwigeze mubaza Impala ngo mwumve ko ari bo baririmbye?? Biraro ko atavuga ko yarihiye Marita amashuri ye yose ku Kibuye no mu Birambo kugira ngo amujyane, yagaruka akaba Kaberuka gute?

Muhire Kuya 12-02-2019

Oya rwose. Abo uko ari 3 ni abo mu karere ka Gatsibo(Kaberuka,Titien na Laurence). Ni inkuru mpamo yo muri za 1981. K.yakoraga muri MINEPRISEC, Marthe muri CSR, Titien kuri Komini. Ubu Bose baritahiye. Paul yibuke neza.

hitabavuga Kuya 11-02-2019

ikigaragara bari abasirimu,muzatugezeho biography yabo.

SHASHAGIRA Kuya 11-02-2019

Barababeshyera uriya musaza ntabwo yitwa KABERUKA ahubwo yitwa BIRARO ni Directeur w’ikigo cy’amashuri abanza ahitwa Ruhingo/Gihango/Rutsiro

Kagwigwi Kuya 11-02-2019

Njye nize mu Rutsiro ahitwa i Murunda niganye n’umukobwa wabo.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...