konka coffee
KONKA

AMAKURU

UKWEZI
Minijust

Imikino yagize uruhare mu komora ibikomere by’Abakinnyi barokotse Jenoside yakorewe Abatutsi

Imikino yagize uruhare mu komora ibikomere by’Abakinnyi barokotse Jenoside yakorewe Abatutsi
12-04-2019 saa 17:31' | By Muhizi Olivier | Yasomwe n'abantu 1045 | Ibitekerezo

Mu gihe Abanyarwanda n’inshuti z’u Rwanda bibuka ku nshuro ya 25 Jenoside yakorewe Abatutsi muri Mata 1994, ikinyamakuru Ukwezi.com twaganiriye n’abakinnyi barokotse Jenoside ariko mu gihe yabaga bakaba bari bato cyane , badusobanurira uruhare rw’imikino mu komora ibikomere basigiwe na Jenoside.

Ubu aba bakinnyi batangiye kuba abagabo , mubo twaganiriye harimo Niyonzima Olivier Sefu umukinnyi wa Rayon Sports FC ndetse n’ikipe y’igihugu Amavubi ,Mugabe Arstide umukinnyi wa Patriots Basketball club akaba na Kapiteni w’ikipe y’igihugu muri uwo mukino, ndetse na Niyonshuti Adrien umugabo wubatse ufite n’umwana umwe, uyu akaba yarabaye umukinnyi wa mbere w’Umunyarwanda ukinnye nk’ uwabigize umwuga ku mugabane w’i Burayi mu mukino wo gusiganwa ku magare ndetse, yanaserukiye u Rwanda mu marushanwa menshi atandukanye .

Duhereye kuri Mugabe Arstide uyu yatakaje abavandimwe be bavukana mu nda ndetse anicirwa se, ibintu ahamya ko byamuhungabanyije cyane mu mizo yambere

Yagize ati "Navukiye i Huye mu ntara y’ amajyepfo Jenoside iba ninaho twari dutuye ni naho narokokeye twari abana batatu nari umwana wa kabiri papa wange mu kuru wange na murumuna wange n’abandi bo mu muryango barabishe ,Jenoside yabaye mfite imyaka 6 birumvikana nari muto,ariko nanone sicyane ku buryo ibyo nabonye nabyibagirwa ,ni’bihe byari bikomeye cyane ,navuga ko byari ibihe by’umwijima ku gihugu cyacu ni ibihe ntakwifuza ko bizongera kuba ku gihugu cyacu ndetse n’ahandi ku Isi, I Huye navuga ko ho ubwicanyi bwatangiye nyuma ugereranije n’ahandi mu gihugu byarangoye kubyakira cyane gusa nagize amahirwe yo gusigarana na Mama wange amba hafi".

Nyuma ya Jenoside mu buzima busharira Mugabe warugeze igihe cyo gutangira ishuri yagiye kwiga nabwo avuga ko byamugoye cyane.

Ati "Byari bigoye gukura ntabavandimwe,gusa nanone kuko nagize Imana yo gusigarana na Mama n’abandi bana babyara bange byatumaga twumva tutari twenyine amashuri nyiga neza ntangira kwiga amashuri abanza ntago byari byoroshye,ariko Mama yambaga hafi kuko yari umwarimu icyo gihe yigisha aho nigaga ,urumva byatumaga numva ntari ngenyine numvaga ntakibazo ndetse ndanayarangiza nkomeza muyisumbuye ”.

Mugabe avuga ko Basketball yagize uruhare mukomora ibikomere yasigiwe na Jenoside birimo kubura umubyeyi we n’abavandimwe be

Uko Basketball yomoye ibikomere yasigiwe na Jenoside birimo no kubura umubyeyi n’abavandimwe be

Avuga ko atangiye amashuri yisumbuye yatangiye gukunda umukino w’intoki wa Basketball ndetse atangira kuyikina yiga mu Iseminari ku Karubanda bita Petis Seminaire Virgo Fidelis ariko aza gukomereza muri College Immacule Conception ari naho yasoreje icyiciro rusange (tronc commun) hanyuma akomeza EAV Ntendezi aza gusoreza st Joseph Kabgayi .

Nyuma yo gusoza amashuri yisumbuye noneho yatangiye gukina Basketball byimbitse imufasha kugenda yomora ibikomere yari yaratewe na Jenosede byo kubura bamwe mu bo mu muryango we Mugabe.

Ati "Urumva muri Sport iyo ariyo yose wigiramo kubana n’abantu bose utitaye ku bwoko cyangwa Akarere muturukamo mwese muhurira muri Sport mukiga kubana neza, Basketball yamfashije gukura numva mfite inshuti,navuga ko nungukiyemo abavandimwe nabuze muri Jenocide ,wa muntu ukwereka urukundo nta kindi aguca kubera gusa mwahuriye muri uwo mukino urumva muri sport iyo ariyo yose wigiramo kubana n’abantu bose utitaye kubwoko cg akarere muturukamo mwese muhurira muri sport mukiga kubana neza ,Basketball yamfashije gukura numva mfite inshuti,navuga ko nungukiyemo abavandimwe,wamuntu ukwereka urukundo ntakindi aguca kubera gusa mwahuriye muri uwo mukino ngenda niga kubana n’abandi sindebe ngo uyu ameze gutya nu wahehe n’ibintu navuga ko byikora ugasanga mwese mwibonanamo nkabavandimwe urumva sinarimfite ikibazo cyo kuba nkiri ngenyine".

Mugabe n’umwe mubakinnyi ngenderwaho mu ikipe y’igihugu ndetse na Patriots BBC abereye kapiteni

Mugabe avuga ko yatangiriye gukina Basketball akina shampiyona muri Rusizi BBC yiga muri EAV Ntendezi muri 2007 nyuma aza gukomereza muri Espoir BBC arangije amashuri yisumbuye muri 2009 akomeza muri CSK 2010 agaruka muri Espoir 2011 ubu akaba akinira Patriots BBC abereye na kapiteni .

Ubu amaze imyaka 11 kuruhembe rwa basketball yo mu Rwanda avuga ko kuba akina Basketball byamwunguye byinshi uretse kunguka inshuti n’abavandimwe

Ati "Byagiye bimfasha mu buzima busanzwe, kuba na bona uburyo bwo kwitunga,nize amashuri ndayarangiza ntakibazo cy’ubushobozi nahuye nacyo gikomeye cyane navuga ko Basketball igenda igufasha kwiteza imbere muri byose".

Mugabe avuga ko iyo ataza kuba akina Basketball abona yari guhomba byinshi ati "bona nari guhomba umunezero ubamo n’ubuvandimwe,kandi umuntu aba yaragiye afunguka mu mutwe ukagera ahantu henshi utari gupfa kugera,..abantu benshi mukamenyana ubona mutakamenyanye iyo uba udakina Basketball ubona bari munzego zitandukanye,ikindi nuko hari benshi baba baragize umuhamagaro kubera imikinire cyangwa se uburyo witwara,mbese nibyinshi nari guhomba".

Ubu urugendo rwo kwiyubaka avuga ko arugeze kure kuko kwiyubaka ari ibya buri munsi ,ariko ko hari byinshi yumva agomba gukora kugirango yiyubake kandi haribyo amaze kugeraho ariko urugamba ruracyakomeza ,gusa avuga ko aho ageze harashimishije kandi abishimira Imana .

Undi mukinnyi twaganiriye warokotse Jenocide yakorewe Abatutsi ni Adrien Niyonshuti warokokeye mu karere ka Rwamagana Intara y’Iburasirazuba , Muri Jenoside harokotse nyirarume we Turatsinze Emmanuel, barumuna be barapfuye, nyirakuru n’abandi benshi barimo bakuru be na bashiki be ba 7 barabishe Adrien yadusangije ku mateka ye.

Yagize ati "Jenoside yabaye mfite imyaka 7 ibihe ntazibagirwa muri uku kwezi kwa kane, byari bimaze gukomera cyane tumaze kuva mu rugo tuba ahantu mu gihuru, twihishemo igihe kirekire, nyuma bamenya aho tuba, biba ngombwa ko tuva muri icyo cyaro aho bita i Munyaga, tuza i Rwamagana tujya mu bavandimwe baraduhisha,Nyuma baje kuhatuvumbura barahatwika bakoresheje lisansi".

Niyonshuti Adrien niwe mukinnyi w’umunyarwanda ukina umukino w’Amagare wagiye gukina Iburayi bwambere nk’ uwabigize umwuga .

Mu bintu avuga ko adashobora kwibagirwa ngo n’ umunsi wa mbere bava mu rugo n’uwa nyuma basubira murugo ndetse no kwihisha ukuntu imvura yabanyagiye.

Ati "Ibintu ntazibagirwa n’umunsi wambere tuva murugo ndetse n’umunsi wanyuma tugaruka I Rwamgana ndetse n’umunsi Inkotanyi zigera i Rwamagana, ntekereza ko iyo harengaho n’isaha imwe uyu munsi ntitwari kuba twibuka abacu ahubwo natwe twari kuba twibukwa cyangwa byararangiye nta n’ugishobora kutwibuka, ariko ubu turiho kandi neza"

Tariki 16 Mata 1994 Niyonshuti avuga ko iyo Inkotanyi ziba zitarafata umujyi wa Rwamagana ubu aba atagihumeka umwuka w’abazima .

Niyonshuti avuga ko nyuma ya Jenoside yagowe no kwakira kubaho ari wenyine adafite abavandimwe be bigatuma ahorana uburwayi bw’umutwe udakira.

Agira ati “Kubyakira byarangoraga cyane ndetse ngahora rwaye umutwe udakira nari narivuje ntaho ntagiye ariko nyuma biza gukira ndetse n’iyo nacaga aho bari bashyinguye wenda ngiye nk’i Kigali nahagaraga ahantu bita aho uwo nyirarumwe wacu yaratuye nkabanza ngaca ho bashyinguye"

Uko umukino w’Amagare wamwomoye ibikomere nyuma ya Jenoside

Adrien avuga ko yabyirutse akunda uyu mukino ,igare cyane ndetse anarikoresha mu buzima busanzwe ndetse no mu mirimo yaburi munsi ariko aza kwimariramo uyu mukino bitewe na nyirarume Turatsinze wamuhaye igare ndetse akajya amutoza nuko bakina uyu mukino.

Avuga ko yatangiye kwitabira amarushanwa afite imyaka 16 muri 2004, icyo gihe yakinnye Tour du Rwanda yambere. Nyuma nyirarume yarapfuye asigara afashwa na Rugambwa John ashimira cyane.

Adrien ati "Gukunda uyu mukino waje kumfasha komora ibikomere natewe na Jenoside kuko iyo ukora sports uba ufite ubuzima bwiza yandwara y’umutwe udashira nayo yaje gukira".

Umukino w’amagare wafashije Niyoshuti gukira umutwe udakira yahoraga arwaye ndetse umwubakamo icyizere none ubu n’umugabo wubatse

Niyonshuti akomeza avuga ko uyu mukino wamufashije komora ibikomere yatewe na Jenoside ndetse akaniyubaka muburyo bw’ubuzima.

Ati "...Nza no gukina nk’uwabigize umwuga muri Afurika y’Epfo muri 2009 ntangira kubona amafaranga ndiyubaka kugeza n’ubu mfite umugore n’umwana".

Akomeza avuga ko icyo umukino w’amagare wa mumariye harimo kumva ko atari wenyine kubera inshuti nyinshyi yagiye ahukuramo ndetse no kuba ntacyo yifuje ngo abure bitume yibaza ko iyo abavandimwe be baba bahari wenda yari kukibona byoroshye .

Undi mukinnyi twaganiriye warokotse Jenoside ni Niyonzima Olivier Sefu n’umukinnyi w’ikipe y’igihugu Amavubi na Rayon Sports akina mu kibuga hagati Sefu yabuze benshi bo mu muryango we muri Jenoside , yaba abo mu muryango wa Papa we ndetse no mu muryango wa Mama we ariko igikomeye cyane nuko Jenoside yatakaje ise umubyara nyuma yaho gato mu 2000 atakaza na mama we .

Niyonzima Olivier n’umwe mubakinnyi ngenderwaho muri Rayon Sports

Sefu avuga ko mbere ya Jenoside bari batuye Kimihurura arinaho yarokokeye agira ati “narokokeye Kimihurura natakaje abantu bo mu muryango wa papa nabo mu muryango wa mama gusa natakaje umubyeyi umbyara ariwe papa”.

Nyuma ya Jenoside Sefu yagowe no gukura ntababyeyi afite ariko nyuma akaza no gutakaza mama we yagize ati “icyangoraga mugukura kwanjye nuko nakuze ntafite papa kandi na nyuma yaho muri 2000 naje kubura na mama gukura ntababyeyi biragoye kuko buri mwana wese abayifuza urukundo rwababyeyi nakuriye mu muryango wa papa rimwe na rimwe nkajya no kuba mu muryango wo kwa mama rero sinabonaga ibyo ntifuzaga byose nkuko narikubibona iyo mba mfite abyeyi “.

Sefu akomeza avuga ko ashimira abo muri iyo miryango yombi bamureze gusa ngo mu kwiga hari ibyamugoraga ati “mu kwiga kwanjye sinize nkuko bikwiye kuko nahinduraga ibigo cyane kubera kuba mu miryango itandukanye ,byarangoye cyane mukwiga najyaga ku kigo nkamaraho imyaka 3 nkaba ngiye muwundi muryango bakaba bampinduriye ikigo bigatuma ndindira mu kwiga”.

Uko umupira w’amaguru womoye ibikomere Sefu yasigiwe na Jenoside yamutwaye umubyeyi we

Sefu avuga ko umupira wamufashije cyane bigatuma atigunga ndetse ubu ukaba umutunze nka kazi ke kaburi munsi agira ati”umupira wamaguru waramfashije cyane kuko nabashaga gukina n’abana bagenzi banjye bigatuma ntakomeza kwitekerezaho kuko sinajyaga nkunda kuba ngenyine kuko byatumaga ntekereza ku babyeyi bange “.

Akomeza avuga ko umupira w’amaguru watumye yunguka umuryango mushya ati” umupira waramfashije kuko watumye nsabana n’abantu benshi batandukanye ariko mbere yuko ntangira kuwukina narigunganga cyane ntakunda kuvuga ariko ubu ndaganira nkanaseka nkumva ko mfite umuryango nakuye mu mupira w’amaguru “.

Sefu avuga ko ashimishwa cyane no gukinira ikipe y’igihugu akaba atanga umusanzu mukubaka Igihugu

Ubu Sefu avuga ko umupira ariwo umutunze ati “umupira w’amaguru niwo untunze kuko watumye ntangira gukorera amafaranga nkufata nk’umwuga wange ,ikindi ubu nkinira ikipe y’igihugu Amavubi n’ibintu byanshimishije cyane kuba watanga umusanzu wawe ugakorera Igihugu “.

Sefu avuga ko umupira wamufashije kwikura mu bwigunge no kubona umuryango mushya yungukiye mu mupira w’amaguru

Mugabe Arstide ,Niyonzima Olivier Sefu na Niyonshuti Adrien bose bakuriye mu mibereho y’ubupfubyi batewe na Jenoside ariko bose bahuriza ku kuba imikino yaratumye batigunga ,ndetse bunguka n’imiryango mishya bakuye mu mikino bakina itandukanye bigatuma bumva batari bonyine ,ubu n’ibamwe mubaha ibyishimo Abanyarwanda mu mukino .


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...